Саудия Арабистони 2026 йилдан бошлаб алкоголь маҳсулотларини сотиш ва истеъмол қилишга рухсат беришни режалаштирмоқда. Бу қадам 2034 йилда ўтказиладиган футбол бўйича жаҳон чемпионатига тайёргарликнинг бир қисми ҳисобланади.

Спиртли ичимликлар фақат 600 га яқин махсус жойда сотилиши режалаштирилган. Булар асосан меҳмонхоналар, дам олиш масканлари ва сайёҳлар учун мўлжалланган ҳудудларда пиво, вино ва сидр сотиб олиш мумкин бўлади.

Германияда етарли миқдорда кўнгиллиларни жалб этиш имкони бўлмаса, 2026 йилдан мажбурий ҳарбий хизматга қайтилади. Бу ҳақда мамлакат мудофаа вазири маълум қилди.

Вазир тегишли қонун лойиҳаси келгуси йилнинг 1 январидан кучга кириши мумкинлигини таъкидлади. Германия армиясида мажбурий ҳарбий хизмат 2011 йилда фақат тинчлик даври учун бекор қилинган эди.

Индонезиянинг марказий қисмидаги Шарқий Ява музофотида бир сутка ичида 11 марта Семеру вулқони отилиши қайд этилди.

Вулқон отилиши натижасида ҳосил бўлган кул устуни вулқон кратеридан 1200 метр ёки денгиз сатҳидан 4876 метр баландликка етган. Маҳаллий аҳоли ва сайёҳларга вулқондан 8 километр жануби-шарқда кратерга яқинлашмаслик тавсия қилинган.

Франция Президенти Эммануэль Макроннинг Вьетнамга борган пайти аёлидан тарсаки егани акс этган видео ижтимоий тармоқларда катта шов-шувга сабаб бўлди. Ушбу ҳолатга Елисей саройи муносабат билдирди.

Видеода Президент самолёт эшигидан кўринади ва ичкарида ким биландир гаплашаётган вақтда бир қўл унинг юзига яқинлашиб, иягига енгил тарсаки туширади. Макрон бу ҳолатга қисқа ҳайрат билдиради, лекин дарҳол ўзини тутиб, камералар қаршисида саломлашади.

Ҳиндистон хавфсизлик кучлари чегарани ноқонуний кесиб ўтишга уринган Покистон фуқаросини отиб ўлдирди.

Ҳиндистоннинг Чегара хавфсизлик кучлари (BSF) берган баёнотга кўра, воқеа Гужарот штатида юз берган. 

Чегара бўйича патруллик қилаётган ҳарбийлар “шубҳали шахс”ни кўрган ва уни тўхташга чақирган. Аммо у бу буйруқни эътиборсиз қолдириб, югуришда давом этган. Шундан сўнг ҳарбийлар унга қарата ўқ узганини маълум қилишган.

Россия қўшинлари 25 майга ўтар кечаси Украинага дронлар ва ракеталар билан энг йирик авиазарбани амалга оширди. Мазкур авиаҳужумга 298 та дрон жалб этилди. АҚШ президенти Дональд Трамп бунга муносабат билдириб, россиялик ҳамкасби Владимир Путинни кескин танқид қилди.

АҚШ раҳбари Путин бутун Украинани босиб олмоқчи экани, бироқ бу “Россиянинг қулашига олиб келиши”ни таъкидлади. Трамп ўз баёнотида украиналик ҳамкасби Владимир Зеленскийни ҳам танқид қилди.

<iframe width="650" height="420" src="https://www.youtube.com/embed/DeMZa1VXy5M" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ирода Жўраева, Улуғбек Тўхтаев, ЎзА