Бухоро шаҳридаги “Хумо” спорт мажмуасида “Китобхонлик ҳафталиги” нинг очилиш маросими бўлиб ўтди.
“Китобсевар миллат” шиори остида ўтказилаётган ҳафталик Ўзбекистон Республикаси Президенти Администрацияси ҳузурудаги Ахборот ва оммавий коммуникациялар агентлиги ҳудудий бошқармаси, Абу Али ибн Сино номидаги вилоят ахборот-кутубхона маркази, Республика Маънавият ва маърифат маркази, Ёзувчилар уюшмаси, Ўзбекистон Ёшлар иттифоқи вилоят бўлимлари, Бухоро давлат университети, Бухоро вилояти маданият бошқармаси, “Умрбоқий мерос” Ўзбекистон маданияти ва санъати тарғибот маркази, вилоят халқ таълими бошқармаси ҳамкорлигида ташкил этилди.
– Мақсад аҳоли, шу жумладан, ёш авлоднинг билим олиши, жаҳон тамаддунига муносиб ҳисса қўшган буюк алломаларимизнинг ҳаёти ва ижодини ўрганиш, ўзбек адабиётининг етук намуналарини хорижий тилларга ҳамда жаҳон адабиётининг энг яхши намуналарини ўзбек тилига таржима қилиш бўйича эришилган натижаларни таҳлил этишдан иборатдир, – дейди Ёзувчилар уюшмаси вилоят бўлими раҳбари Шодмон Сулаймонов. – Шу билан бирга бу борадаги вазифаларни белгилаб олиш, китобхонлик маданиятини, оилавий китобхонлик анъаналарини тарғиб қилиш, ёш авлодни миллий адабиётга, она Ватанга юксак муҳаббат ва садоқат руҳида тарбиялашдир.
[gallery-6732]
“Ёш китобхон” танловининг бу йилги мавсумида 10-14 ёш тоифаси бўйича Бухоро шаҳаридаги 30-умумтаълим мактаби ўқувчиси Мухлиса Насимова 1-ўринни қўлга киритди. Унга Президент совғаси — “Спарк” автомобили берилди. Мухлисанинг китоб ўқиб ота-онасига “Спарк” олиб бергани кўпчилик ёшларимиз учун ҳақиқий намуна бўлди. Китобхонлик ҳафталиги давомида нашриётларда сўнгги йилларда чоп этилган янги китобларнинг тақдимоти, таниқли, истеъдодли адиб ва шоирлар билан учрашувлар, ношир ва матбаачилар билан мулоқотлар ўтказилди.
Тадбирларда китоб савдо ярмаркалари, китобхонлар ўртасида сўровномалар, совринли викториналар, интеллектуал беллашувлар ҳам ўтказилди. Китоб кўргазмалари, ўқувчиларнинг ижодий ишлари барчада катта таассурот қолдирди. Ғолибларга мутасаддиларнинг диплом ва қимматбаҳо совғалари топширилди.
Шаҳар ва туманларда ўтказилаётган “Китобхонлик ҳафталиги” тадбирлари барча китобхонларни қамраб олмоқда.
Зариф Комилов, Тоҳиржон Истатов (сурат), ЎзА