Германия таркибидаги Бавария федерал ери раҳбари Маркус Зёдер Украинадан келган қочқинларга берилаётган ижтимоий ёрдам — фуқаролик нафақаси (Bürgergeld)ни тўхтатиш таклифини илгари сурди. Бу ҳақда "Euronews" ёзган.

Мулозим таъкидлашича, украиналиклар фақат “Asylbewerberleistungsgesetz” — Қочоқлар учун махсус ёрдам қонуни асосида, ҳозиргидек тўлиқ эмас, балки анча кам ижтимоий ёрдам олиши керак.

— ГФРда фуқаролик нафақаси доимий яшовчи ёки даромади етарли бўлмаган шахсларга энг кам яшаш шароитини таъминлаш учун берилади, — дейди Зёдер. — Махсус ёрдам эса вақтинчалик ва анча кам миқдордаги нафақа ҳисобланади.

Ҳозир 2025 йил 1 апрелдан кейин келган украиналиклар фақат махсус ёрдам олиши белгиланган, лекин ушбу тартиб қонунан ҳали кучга кирмаган. Амалда бу санадан кейин ҳам айрим қочоқлар тўлиқ фуқаролик нафақаси олишда давом этмоқда.

Сиёсатчининг фикрича, Германия Украина фуқароларига Европадаги бошқа ҳеч бир давлат бермаётган даражада сахий ёрдам кўрсатмоқда. Бу қочоқларнинг меҳнат бозорига киришини сустлаштираётган асосий омилдир:

– Улар кўпинча яхши малакага эга бўлишига қарамай, ишга жойлашмаяпти. Нафақа юқорилиги бунга сабаб бўлиши мумкин.

2024 йил ГФРда фуқаролик нафақасига жами 46,9 миллиард евро сарфланган. Ушбу миқдорнинг 22,2 миллиарди чет элликлар, хусусан 6,3 миллиард евро украиналиклар ҳиссасига тўғри келган. Мазкур маълумот Бундестагда Ижтимоий ишлар вазирлиги томонидан тақдим этилган расмий ҳисоботда келтирилган.

Мусулмон Зиё, ЎзА