Германия ўзининг термоядровий реакторини ишга туширмоқчи
ГФР канцлери Фридрих Мерц ўлканинг биринчи маҳаллий термоядровий реакторини ишга тушириш бўйича режасини очиқлади.
Таъкидланишича, Германия ҳукумати дунёдаги биринчи тижорат термоядровий реакторини ишга тушириш учун 2029 йилга қадар 1,7 миллиард евродан ортиқ маблағ ажратишни кўзда тутувчи “Термоядровий ҳаракатлар режаси”ни тасдиқлаган эди.
– Биз федерал ҳукуматда нафақат термоядровий энергияни юқори технологияли ривожланиш дастуримизга асосий технология сифатида киритдик, балки мамлакатнинг биринчи термоядровий реакторини ишга тушириш бўйича улкан мақсадни ҳам қўйдик, -деди Мерц Ганновер ярмаркасига ташрифи чоғида.
Кўргазма стендларини айланиб чиқиш чоғида канцлер келажакдаги иншоотнинг асосий компонентлари, хусусан, тритий ишлаб чиқариш технологиялари билан танишди.
– Бу келажакдаги термоядровий реакторнинг юраги, -деди у. - Охир-оқибат, биз у ерда термоядровий ёқилғи - тритий ишлаб чиқаришимиз мумкин бўлади. Бу катта ютуқ.
Канцлер шунингдек, Германия расмийлари узоқ муддатда термоядровий технология асосида электр станцияларини қуришни режалаштираётганини тилга олди. У мамлакат ушбу тадқиқотда аллақачон “мутлақ глобал элита” қаторига кирганини маълум қилди.
Мерц илгари ГФРнинг ядровий энергиядан воз кечиш қарорини ортга қайтариб бўлмайдиган қарор, деб атаган эди. Шу билан бирга, Европа Комиссияси президенти Урсула фон дер Ляйен Европанинг ядровий энергиядан воз кечиши стратегик хато эканлигини тан олганди.
2011 йилда Германиянинг ўша пайтдаги канцлери Ангела Меркел бошчилигидаги ҳукумат 2022 йилга келиб атом энергиясидан бутунлай воз кечишга қарор қилди. Япониядаги “Фукусима-1” атом электр станциясидаги ҳалокат ушбу қарор учун охирги сабаб бўлди. 2022 йилга келиб эса мамлакатда фақат учта атом электр станцияси ишлаётган эди. Россия газини босқичма-босқич тўхтатиш тўғрисидаги қарор туфайли уларнинг фаолияти 2023 йил апрель ойининг ўрталарига қадар узайтирилди, кейин эса улар фойдаланишдан чиқарилди.
С.Раҳимов, ЎзА
