Ахборот ва оммавий коммуникациялар агентлигида бўлиб ўтган матбуот анжумани Ўзбекистонда юқимли касалликларни аниқлаш, олдини олиш ва уларни бартараф этиш борасида халқаро ташкилотлар билан олиб борилаётган ҳамкорликни ёритишга бағишланди.

Жаҳон соғлиқни сақлаш ташкилотининг Ўзбекистондаги вакили Ашина Ҳалакдина ва ЮНИСЕФ раҳбари Реҳина Кастижио глобал гепатит статистикаларига таяниб, бугун дунёда ҳар йили 1,3 миллион инсон айнан гепатит сабаб ҳаётдан кўз юмаётгани, бу кўрсаткич сил касаллигига тенг экани ҳақида огоҳлантирди. 

Таъкидланишича, Ўзбекистон Президентнинг 2022 йилдаги ПҚ-243-сонли қарори асосида кенг кўламли скриининг ва профилактика ишлари олиб борилмоқда. Жорий йил 14 апрель ҳолатига кўра, 1,4 миллиондан ортиқ фуқаро гепатит Б ва С турларига текширувдан ўтказилган бўлиб, 2,8% ҳолатда гепатит Б, 3,4% ҳолатда эса гепатит С аниқланган. 

Эътиборга лойиқ жиҳати – беморларни антивирал даво билан қамраб олиш режаси 10,5 минг нафарга етказилмоқда. 

Бундан ташқари, касаллик юқтириш хавфи юқори бўлган 119 мингдан ортиқ тиббиёт ходимлари тўлиқ эмланган. Эмлаш мавзуси айниқса долзарб бўлиб, 27 апрелдан бошланган ва 3 майгача давом этадиган Европа Иммунизация Ҳафталиги доирасида ҳам кенг муҳокама қилинади. 

Бугунги кунда Жанубий Корея билан ҳамкорликда юқумли онкологик касалликларнинг олдини олишга қаратилган лойиҳа доирасида бир қатор амалий ишлар амалга оширилмоқда. 

Хусусан, чекка ҳудудларда яшовчи аҳолининг тиббий саводхонлигини ошириш мақсадида учрашувлар, ОАВ ва ижтимоий тармоқлар орқали чиқишлар ташкил этилган. Яна 10 та сайёр тренинг орқали 300 дан ортиқ тиббиёт ходимининг малакаси оширилган.

Ҳудудларда рақамли технологияларни жорий этиш бўйича эса 70 дан ортиқ мутахассис 7 та тренингда қатнашган. Бундан ташқари, гепатит ва бачадон бўйни саратонини эрта аниқлаш бўйича махсус ташхис дастури ишлаб чиқилиб, замонавий диагностика ускуналари харид қилинган.

Шунингдек, ЖССТ вакиллари юртимиздаги эмлаш кампанияларини қўллаб-қувватлашга тайёр эканликларини билдириб, ОАВ орқали аҳолининг хабардорлигини ошириш муҳимлигини таъкидлашди.

Мутахассислар оммавий равишда нотўғри маълумот тарқалиши эмлашга бўлган ишончни сусайтираётганини ва бунга қарши илмий асосланган коммуникация стратегиялари зарурлигини алоҳида таъкидлашди. 

Матбуот анжумани якунида журналистлар ўзларини қизиқтирган саволларга жавоб олишди.

<iframe width="650" height="420" src="https://www.youtube.com/embed/HCZBmRYEwBs" title="O‘zbekiston gepatitga qarshi qanday kurashmoqda?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

М.Эшмирзаева, Д.Якубов, ЎзА