“Hamkorbank” АТБ мамлакатимизда самарали фаолият юритаётган банклардан бири ҳисобланади. Банкнинг аҳоли ўртасида оммалашиши, жамиятдаги нуфузининг ортишида банк кўзгуси бўлган – “Hamkor press” газетасининг ҳам алоҳида ўрни бор.

Шу кунларда “Hamkor press” газетаси ташкил этилганлигининг 20 йиллиги нишонланди.  

Газета ташкил этилганлигининг 20 йиллиги муносабати Банк бошқаруви раиси Бахтиёр Жўраев таҳририят жамоаси билан учрашиб, мулоқот ўтказди. Учрашувда Бошқарув раиси газета ходимларини 20 йиллик айём билан муборакбод этиб, ўзининг самимий тилакларини билдирди.  

[gallery-19253]

Учрашувда газетанинг банк ҳаётидаги ўрни ва нашр ходимларининг самарали фаолияти алоҳида эътироф этилди. Газета муҳаррири Акбаржон Назаров, мухбир Нигора Тўхтаматова сўз олиб, “Hamkor press” нафақат вилоят, балки, республикадаги кўп нусхада чоп этилаётган нашрлардан бири эканлиги, бунда “Hamkorbank”нинг роли ва кўмаги муҳим  аҳамият касб этаётганлигини алоҳида таъкидлашди. Банк бошқаруви раҳбариятига самимий муносабат, эътибор ва қўллаб-қувватлаш учун ташаккур билдирилди.    

Газета ташкил этилганлигининг 20 йиллиги муносабати билан газета ходимлари банк бошқаруви раисининг фахрий ёрлиқ ва пул мукофоти билан тақдирланди. Шунингдек, банк томонидан таҳририятга “Кобальт” автомашинаси тақдим этилди.  

– Юртимизда газета муассисларининг ўз нашрларига эътибори ноёб ҳодисага айланиб бораётган бугунги кунда банк раҳбариятининг таҳририят жамоасига кўрсатган эътибори ва кўмагидан беҳад хурсанд бўлдик, – дейди газета муҳаррири Акбархон Назаров. – Бу эътибор жамоамизга куч, шижоат, илҳом бағишлайди.  

Ф. Убайдуллаев,  

З. Умрзоқов (фото),  

ЎзА мухбирлари