Фавқулодда вазиятлар вазирлиги академиясида Ўзбекистон Республикаси Қуролли Кучларининг 33 йиллиги ҳамда 14 январь - Ватан ҳимоячилари куни муносабати билан “Заковат” интеллектуал ўйини ташкил этилди.

Курсантларнинг бўш вақтини мазмунли ташкил этиш, интеллектуал салоҳиятларини рўёбга чиқариш, эркин ижодий фикрлашлари ҳамда иқтидорларини намоён этишларига кўмаклашиш, ёшларни ҳарбий-ватанпарварлик руҳида тарбиялаш, дунёқарашларини кенгайтириш мақсадида ташкил этилган тадбирда академиянинг барча батальон курсантлари ҳамда “Махсус муҳандислик қурилиш бошқармаси” аскарларидан таркиб топган “Лидерлар”, “Экстремал”, “Муҳофаза”, “Эверест”, “Аскарлар” жамоалари ўзаро беллашдилар.

Қизиқарли ўтган билимлар беллашуви натижаларига кўра, 4-батальон курсантларидан таркиб топган “Эверест” жамоаси биринчи ўринни эгаллади. 1-батальон курсантларидан таркиб топган “Лидерлар” жамоаси иккинчи ўринни эгаллаган бўлса, учинчи ўрин 3-батальон курсантларидан таркиб топган “Муҳофаза” жамоасига насиб этди.

Тадбир доирасида истеъдодли курсантлар томонидан ижро этилган куй-қушиқлар иштирокчиларда катта таассурот қолдирди.

Якунда ташкилотчилар томонидан ғолиб бўлган жамоалар ҳамда фаол қатнашган иштирокчиларга диплом, ташаккурнома ва эсдалик совғалари топширилди.

Гулноза Бобоева,

ЎзА