Тошкент вилояти ҳокимлигида Ўзбекистон Республикаси фуқаролигига қабул қилинган 11 нафар фуқарога шахсини тасдиқловчи паспорт тантанали равишда топширилди. Тадбирда вилоят ҳокими Зойир Мирзаев, давлат ва жамоат ташкилотлари вакиллари қатнашди.

Қайд этилганидек, юртимизда истиқомат қилаётган кўп миллатли халқимизнинг ҳаётини фаровон қилиш, уларнинг ҳуқуқ ва эркинликларини таъминлашга алоҳида эътибор қаратилмоқда. Аслида шу юртда яшаб, давлат ва жамият ҳаётида фаол қатнашаётган лекин фуқароликка эга бўлмаётган ҳар бир киши кўнглида армони бўлиши табиий. Шуни алоҳида эътиборга олиб Тошкент вилоятидаги масъул ташкилотлар томонидан тизимли ишлар амалга оширилмоқда. 

Хусусан, 2016 йилдан ҳозиргача ҳудудда 4 минг 153 нафар шахсга мамлакатимиз фуқаролигига қабул қилинган эди. Шу билан бирга, Ўзбекистон Республикаси фуқаролигини тан олиш бўйича жами 7 минг 395 нафар шахсларнинг ҳужжатлари кўриб чиқилди ва фуқаролик паспорти (идентификация ID-карта) билан ҳужжатлаштирилди. Эндиликда вилоят бўйича жами 15 минг 8 нафар шахс Ўзбекистон Республикасининг тенг ҳуқуқли фуқаросига айланди. 

– Фуқаролик паспорти олганимдан хурсандман, – дейди Тожикистон Республикасида туғилган Санжарбек Абдуқаххаров. – Узоқ йиллардан бери шу юртда яшаб, оилам билан юртнинг ривожи учун меҳнат қиламан. Давлатимиз томонидан менга ҳам бу ҳужжатнинг берилиши қалбимда ўзгача ифтихор ҳиссини уйғотди. Бу хабарни эшитганда яқинларим ҳам хурсанд бўлди, мен эса, кўзларимда қувонч ёшларимни тўхтатолмадим. 

А.Мусаев, ЎзА