Франция 15 ёшгача бўлганларга ижтимоий тармоқларни тақиқламоқчи
Франция парламенти 15 ёшга тўлмаган болаларнинг ижтимоий тармоқлардан фойдаланишини тақиқловчи қонун лойиҳасини маъқуллади. Шу тариқа мамлакат Европа Иттифоқида (ЕИ) бундай умумий чекловни қонун даражасида қабул қилган биринчи давлатга айланди. Ҳужжат Эммануэль Макроннинг иккинчи президентлик муддатидаги энг муҳим ташаббуслардан бири ҳисобланади.
Қонун лойиҳасини парламентнинг ҳар икки палатаси қўллаб-қувватлади. Ҳужжатга мувофиқ, мактаб ўқувчилари учун мобил телефонлардан фойдаланишга оид чекловлар ҳам кучайтирилмоқда. Макрон янги тартибни сентябрь ойида бошланадиган ўқув йилидан амалга киритишни истамоқда. Ҳужжат аввал Франция конституциясига мувофиқлиги юзасидан ҳуқуқий экспертизадан ўтиши керак, бу эса унинг кучга киришини кечиктириши мумкин.
Мазкур ташаббус ўлка парламентида бирдек қўллаб-қувватланмади. Фақат сўл қанотдаги “Бўйсунмас Франция” (La France Insoumise) партияси унга қарши овоз берди, социалистлар эса бетараф қолди. Уларнинг фикрича, бутун ижтимоий тармоқларни тақиқлаш ўрнига болалар учун хавфли бўлган функцияларни чеклаш самаралироқ ечим бўлиши мумкин.
Болаларнинг рақамли платформалардан фойдаланишини чеклаш масаласи Европанинг бошқа давлатларида ҳам кун тартибига чиқмоқда. Греция, Словения ва Швеция шундай чораларни тайёрлаётган бўлса, Испания ёш чегарасини 16 ёш, Австрия эса 14 ёш этиб белгилашни муҳокама қилмоқда. Шу билан бирга, Европа комиссияси раиси Урсула фон дер Ляйен болаларнинг ёшига қараб босқичма-босқич кириш тизимини жорий этиш, шунингдек, кичик ёшдаги болалар учун экранлардан фойдаланишни чеклаш бўйича таклифлар ёздан кейин тақдим этилишини маълум қилди.
Мусулмон Зиё, ЎзА
