Тошкент ботаника боғида Ўзбекистон Республикаси Фанлар академияси томонидан Осиё тараққиёт банки (ОТБ) ва Жаҳон банки дастури кўмагида “Формула-2025” очиқ осмон остидаги кенг кўламли илмий-оммабоп фестиваль ташкил этилди.

“Формула-2025” Ўзбекистондаги биринчи йирик миллий очиқ осмон остидаги илмий алоқа платформаси бўлиб, у олимлар, ихтирочилар, ўқитувчилар, талабалар, мактаб ўқувчилари ҳамда илм-фан ва келажакка қизиқувчи барчани бирлаштирди.  

Фестиваль турли викториналар, маҳорат дарслари ва илмий стендлар, олимларнинг очиқ ва қизиқарли маърузалари, илм-фанда аёлларнинг ролига бағишланган панель сессия ҳамда Фанлар академияси олимлари ўртасида “Заковат” интеллектуал ўйини каби кенг кўламли тадбирларни қамраб олди.

–Биз илм-фан ривожи аҳоли фаровонлигини ошириш ва иқтисодий ўсишга олиб келади, деб ҳисоблаймиз, – дейди ОТБнинг Ўзбекистондаги ваколатхонаси раҳбари Канокпан Лао Арайя. –  Инновацияларни жорий этиш ва стратегик ислоҳотларни қўллаб-қувватлаш орқали биз технология ва билим модернизациясининг ҳаракатлантирувчи кучига айланган Ўзбекистонда барқарор ва инклюзив иқтисодиётни барпо этишга ўз ҳиссамизни қўшмоқдамиз.

Тадбир давомида Ўзбекистон Фанлар академияси вице-президенти Шаҳло Турдиқулова фанга стереотиплар эмас, истеъдодлар кераклигини, илм йўлини танлаган ҳар бир ёш янги ютуқ ва ғоялар сари қадам қўйиши лозимлигини қайд этди.

[gallery-23421]

Фестивалга ташриф буюрувчилар биологиядан тортиб археологиягача турли фанлар бўйича олимлар томонидан қилинаётган янгиликлар билан яқинроқ танишиш имкониятига эга бўлди.  

Муҳайё Тошқораева,

ЎзА