Грузиянинг Батуми шаҳрида дунёнинг энг кучли аёл гроссмейстерлари иштирокида ўтаётган FIDE жаҳон кубогининг 3-тур ўйинларининг биринчи партияси ортда қолди.

Кеча ўтказилган 16 та жуфтликдаги ўйинларнинг 7 тасида ғалаба қайд этилган бўлса, 9 та учрашувда тенглик юз берди.

Ҳамюртимиз Умида Омонова кеча қозоғистонлик 15 ёшли Элназ Калиахмет билан куч синашди. Қизиқарли кечган ўйинда муроса йўли танланди. У.Омонова қора доналарда ҳаракатланишига қарамай, рақибасини бир неча бор мураккаб аҳволга келтирди ва баҳснинг 46-юриш ҳолатида ғалабага тенг  дурангга эришди.

Бугун, 13 июль куни 3-турнинг жавоб баҳслари бўлиб ўтади. Мазкур учрашувда Умида оқ доналарда Элназ Калиахметга қарши ҳаракатланади.

Воқеалар ривожидан олдинга ўтиб айтадиган бўлсак, бугунги учрашувда Умида ғалабага эришса, кейинги босқичда хитойлик Лей Тинцзе ва болгариялик Антоанета Стефанова жуфтлиги ғолибига рўбарў келади. Бу мақсадга эришиш учун Умида Омонова кечаги дурангни бугун ғалабага айлантириши лозим бўлади.

Кеча ўтказилган 3-турнинг 1-партиясида Лей Тинцзе- Антоанета Стефанова ўртасидаги ўйинда хитойлик шахматчининг қўли баланд келди.

Эслатиб ўтамиз, мукофот жамғармаси 676 минг 250 АҚШ долларидан иборат FIDE жаҳон кубогининг финал ўйинлари 26-28 июль кунлари ўтказилади.

Тўлқин Рўзиев, ЎзА