Эрон Исроилнинг Ливанга зарбасига жавобан Ҳурмуз бўғозини қайта ёпди
Вашингтон билан келишувга қарамай, Теҳрон Исроил ҳарбийларининг Ливанга қаратилган кучли зарбасидан сўнг Ҳурмуз бўғозини қайта ёпишни буюрди, деб хабар берди Euronews.
Эрон давлат оммавий ахборот воситалари ҳам Ҳурмуз бўғози Исроилнинг Ливанга ҳужумларига жавоб сифатида ёпилганини маълум қилди.
Эроннинг бу қарори икки ҳафталик тинчлик келишуви кучга кирган кунга тўғри келди. Бу келишув Теҳрон ва Вашингтон орасида ойлаб давом этган қуролли тўқнашувларга барҳам берган эди.
Тинчлик келишувининг асосий шартларидан бири - Эрон Ҳурмуз бўғози орқали кемалар ҳаракатини қайта йўлга қўйиши керак эди. Бу эса нефть ва газ етказиб беришдаги тўсиқларни юмшатиб, нархларни барқарорлаштириши лозим эди.
Аммо, АҚШ президенти Дональд Трамп ва Исроил бош вазири Биньямин Нетаньяҳу тинчлик келишувида Ливан назарда тутилмаганини айтган. Аммо музокараларда воситачи сифатида қатнашган Покистон буни рад қилмоқда.
Ливан соғлиқни сақлаш вазирлиги хабар қилишича, Исроил ҳаво зарбалари натижасида камида 112 киши ҳалок бўлиб, 837 киши жароҳат олган. Энг ачинарлиси, бу зарбаларни келишувдан кейин Исроил ҳарбийлари амалга оширган.
Исроил ҳарбийларининг баёнотида айтилишича, уларнинг мақсади фақат ҳарбий инфратузилмаларни йўқ қилиш бўлган.
<iframe width="412" height="732" src="https://www.youtube.com/embed/NilIlbqjeHw" title="Eron Isroilning Livanga zarbasiga javoban Hurmuz boʼgʼozini qayta yopdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, ЎзА
