Фарғона вилоятида велоспортнинг шоссе йўналиши бўйича Ўзбекистон чемпионати ўтказилмоқда. Мазкур чемпионат Халқаро велосипедчилар иттифоқи томонидан тузилган календарда рўйхатга олинган бўлиб, спортчиларимиз учун зарур рейтинг очколарини қўлга киритишга ёрдам беради.

Мусобақанинг шоссе йўналиши бўйича яккалик пойгаларининг эркаклар ўртасидаги баҳсларида Никита Светков, Дмитрий Бочаров ва Муроджон Холмуродов шоҳсупага кўтарилди. Аёллар орасида эса кутилганидек Янина Кускова маррага биринчи бўлиб етиб келди. Шунингдек, Асал Ризаева ҳамда Самира Исмоилова яккалик пойгаларида кумуш ҳамда бронза медалига эга чиқди.

Ўзбекистон велосипед спорти федерацияси томонидан ташкил этилаётган мазкур мамлакат биринчилигининг бугунги беллашувларида велоспортчилар жамоавий пойгаларда медаллар учун рақобатлашади.

Жавоҳир Тошхўжаев,

ЎзА