Янгиер "Энергетика технопарки" Хитойнинг энергия бўйича етакчи компанияси –“Tianjin Sianjin Power Supply Technology” билан ҳамкорликда амалга оширилаётган муҳим лойиҳадир.

Тошкент кимё-технология институти Янгиер филиалида жойлашган ушбу технопарк мобил телефонлар, мобил ҳисоблаш қурилмалари ва бошқа мобил ускуналарда қўлланиладиган литий-ион батареялар (Li-ion) ишлаб чиқаришга ихтисослашган бўлиб, технопаркка инвестиция сифатида 12,5 миллиард долларлик ускуналар киритилган. Технопаркда нафақат Ўзбекистон, балки МДҲ давлатларига ҳам экспорт қилинадиган маҳсулотлар ишлаб чиқарилади. 

Маҳсулот ассортименти қуйидагиларни ўз ичига олади: турли хил қурилмалар учун литюм-ион батареялар, портатив зарядловчилар, Электр велосипедлар ва скутерлар учун батареялар, энергияни сақлаш қурилмалари, портатив электр асбоблари учун батареялар.

Технопарк таълим муассасалари билан ҳам фаол ҳамкорлик қилиб, айни пайтда ТКТИ Янгиер филиалининг “Электр энергетикаси”, “Технологик жараёнлар ва ишлаб чиқаришни автоматлаштириш ва бошқариш”, “Технологик машиналар ва ишлаб чиқаришни бошқариш” йўналишларида таҳсил олган 10 нафар битирувчиси ўзларининг илк иш фаолиятини бошлаган.

Мазкур технопаркнинг ишга тушиши вилоятда инновацион энергетика технологияларини ривожлантириш учун янги истиқболларни очиб, ҳудуднинг иқтисодий юксалиши ва ривожланишига салмоқли ҳисса қўшади. Бу илғор технологияларни жорий этиш, янги иш ўринлари яратиш ва таълим имкониятларини яхшилашга кўмаклашмоқда, бу эса умуман Янгиер шаҳри ва унинг атрофидаги туманларнинг ижтимоий-иқтисодий аҳволига ижобий таъсир кўрсатади.

Ш.Суяров, ЎзА мухбири