«Янгиқўрғон картошка уруғчилик маркази томорқа хизмати» ана шу мақсадда ташкил этилди.

Наманган вилоятининг Янгиқўрғон тумани картошка етиштириш учун қулай иқлим шароитига эга ҳудудлардан бири. Ўтган мавсумда тумандаги 51 та маҳалла фуқаролар йиғинидаги 25,6 минг хонадоннинг 1024 гектар майдонига картошка экилган эди.  

Айни вақтда туманда хонадонларда картошка экишни кўпайтириш ва сифатли уруғлик ҳисобига ҳосилдорликни кескин ошириш режалаштирилган. Қиймати 4,6 миллиард сўм бўлган мазкур лойиҳа доирасида Нидерландиядан 525 тонна, шундан Фермер, деҳқон хўжаликлари ва томорқа ер эгалари кенгаши ҳузуридаги жамғарма ҳисобидан ажратилган 3 миллиард сўмлик кредит маблағларига 325 тонна супер элита картошка уруғи олиб келинди.

– Картошка етиштиришда тажриба тўплаган 3780 хонадондаги 150 гектарга 525 тонна уруғ экилади, – дейди Наманган вилояти фермер, деҳқон хўжаликлари ва томорқа ер эгалари кенгаши раиси Азиз Абдусаломов. – Шунда 8 хил нав – «Санте», «Примабелла», «Сагита», «Лизетта», «Констанса», «Арнова» каби юқори навли картошка уруғлари экилади, 5250 тонна биринчи авлодли картошка уруғлари етиштирилади. Бу эса 75 минг хонадоннинг 1540 гектар майдонига етади. Шу тариқа вилоятда қўшимча 101 мингта хонадонда «бир маҳалла – бир маҳсулот» тамойили асосида картошка экиш тизимига ўтилади. Шунда ҳар бир хонадонда ўртача 5 сотихда 1500 килограмм картошка етиштирилиб, 6,0 миллион сўм даромад олинади.

Ушбу ишлар амалга оширилса, йилда 2 марта эртаки ва такрорий усулда картошка экилади. Эртаки картошка эрта баҳорда плёнка остига экилиши ҳисобига маҳсулотнинг нархи ошиш даврига тўғри келиб, маҳсулот қиймати кескин кўтарилишининг олди олинади.

Картошка экини совуқроқ иқлимда яхши ривожланиши сабабли, вилоятнинг иссиқ ҳудудларида (Уйчи, Учқўрғон, Норин, Тўрақўрғон туманларида) тўқсонбости усулида экилиши йўлга қўйилади. Бунда ерларга маҳаллий ўғитлар солиниб, хас-хашаклар тепасига ёпиб қўйилади. Бунинг ҳисобига чилла чиқиши билан, экилган уруғ ҳаракатга келиб, тез униб чиқади.

– Ҳозир бу жараён тажриба сифатида Уйчи туманида 30 гектар майдонда амалга оширилмоқда, – дейди А.Абдусаломов. – Бунинг учун, энг аввало, соҳа бўйича илғор тажрибага эга бўлган малакали мутахассислар жалб этилади. Улардан белгиланган агротехник тадбирларнинг бажарилиши, кимёвий ишлов ўтказиш муддатлари, маҳаллий ва минерал ўғитлар билан озиқлантириш каби тадбирларни бажаришда фойдаланилади.

Қайд этиш керакки, сифатли картошка уруғи етказиб бериш, белгиланган агротехник тадбирларни амалга ошириш, соҳага илғор тажрибаларни жорий этиш натижасида вилоятда картошка уруғчилик базасини яратиш учун томорқа хизмати корхонаси негизида «Картошкачилик» томорқа кластери ташкил этилади.

Бу лойиҳа учун 10 миллиард сўм, шундан жамғарма маблағлари ҳисобидан 6 миллиард сўм ажратилади. Шунда картошкачилик кластери тизимида уруғ етиштириш иссиқхонаси барпо этилади, маҳсулотларни сақлаш учун музлатгичлар қурилади, аҳоли томорқаларига техника ва агрохизматлар кўрсатилади, уруғ, ўғит, кимёвий воситалар сотиш дўкони ташкил этилади. Энг муҳими, картошкачилик йўналишида «Бир маҳалла – бир маҳсулот» тамойили йўлга қўйилади.

Сайёра Шоева, ЎзА