Байден президентлик пойгасидан чиқиши шартини маълум қилди
Америка етакчиси Жо Байден BET телеканали билан суҳбатда агар шифокорлар унинг соғлиғида муаммо топса, президент сайлови пойгасидан чиқишини мълум қилди.
“CBS News” ушбу суҳбатдан парча келтирган: Агар менда қандайдир касаллик топилса, шифокорлардан бири сизда шундай муаммо бор, деса, пойгадан чиқаман.
Оқ уй раҳбари “Кексалик – донишмандлик”, деган.
Бунгача у соғлиғи ҳақида гап кетганда, қўшимча текширув шарт эмаслигини айтиб, мабодо шифокорлар талаб қилса, тайёрлигини таъкидлаган.
Байден Трамп билан ўтказган телебаҳсда ютқазгандан кейин демократлар орасида президентликка бошқа номзод кўрсатишга чақириқлар кўпайди.
Иккинчи теледебат 10 сентябрга белгиланган. Президент сайлови эса 5 ноябрда бўлиб ўтади.
Польша Президенти Россия ҳақида кескин баёнот берди
Россиянинг Украина устидан ғалабаси Шимолий Атлантика альянси билан урушга олиб келиши мумкин, деди Польша Президенти Анжей Дуда “Wirtualna Polska” нашрига интервью берган чоғда.
“Россиянинг Ғарб билан эҳтимоли юқори бўлган урушига жуда кам вақт қолди”, — деди сиёсатчи Россия билан урушда Украинанинг мағлубиятга учраши эҳтимоли билан боғлиқ саволга жавоб бераркан.
Америкада Трампга суиқасддан кейин вазият қандай?
“Рейтер” агентлиги ва “Ipsos” компанияси ўтказган сўров натижасига кўра, 80 фоиз америкаликлар собиқ Президент Дональд Трампга уюштирилган суиқасддан кейин мамлакатда вазият назоратдан чиқиб кетади, деб ўйламоқда.
Сўровда қатнашганларнинг тахминан 84 фоизи, экстремистлар зўравонлик ҳаракатини сайловдан кейин ҳам амалга оширишидан хавотир билдирган. Ижтимоий тадқиқот рўйхатга олинган 992 сайловчи орасида ўтказилган.
Шанба куни Трамп Пенсильванияда митингни отишма туфайли тўхтатишга мажбур бўлди. Кейинроқ у қулоғидан яралангани, кўп қон йўқотганини айтди. Махфий хизмат гумонланувчи отиб ўлдирилганини маълум қилди. Отишма пайти бир томошабин ҳам ҳалок бўлган, икки киши оғир жароҳат олган.
Вэнс номзоди вице-президентликка кўрсатилиши
Украина учун мураккаб сценарий
Украина Олий Радаси депутати Алексей Гончаренко америкалик сенатор Жей-Ди Вэнс номзоди республикачилардан вице-президентликка кўрсатилиши Украина учун “жуда мураккаб сценарий” деди. У Вэнсни “жуда ақлли, айёр ва совуққон”, дея таърифлади.
“Time” нашри Гончаренконинг қуйидаги сўзларини келтирган:
– Биз учун жуда мураккаб сценарий. У урушга ва Украинага нисбатан жуда ишончсиз қарайди.
Ўзини ошкор қилмаган украиналик мансабдор фикрича, Вэнс номзоди илгари сурилиши билан Украина энди тилига ва ҳаракатига эҳтиёт бўлиши керак.
Украина мавзусидаги чиқишлари билан ҳам танилган Жей-Ди АҚШ томонидан ажратилаётган кўп миллиард долларлик ёрдамни танқид қилиб, ҳукуматни Россия билан музокарага чақириб келади. Сиёсатчи таъкидлашича, Киевнинг 1991 йилдаги чегараларни қайта тиклаш мақсади амалга ошмайдиган иш. Можарони ҳал қилиш учун бетараф давлат бўлиш ва ҳудудий баҳсни музлатиш лозим.
Эстонияда мудофаа солиғи жорий қилинади
Эстония ташқи ишлар вазири вазифасини бажарувчи ва парламентдаги “Ээсти-200” (Eesti 200) партияси раҳбари Маргус Тсахка мамлакатда оғир мудофаа солиғи жорий этилиши ва камида 2027 йилгача ундирилишини айтди. Бу хабарни ERR телерадиокомпанияси тарқатган.
– Давлат бюджетини шакллантиришда асосий эътибор жуда қийин қарорларга қаратилмоқда, – деди Маргус Тсахкна.
Аввалроқ Эстония собиқ мудофаа вазири, “Ислоҳотлар” партиясининг парламентдаги фракцияси аъзоси Калле Лаанет мудофаа харажатини ошириш заруратига “Россия Федерацияси таҳдиди” сабаб бўлаётганини таъкидлаганди.
АҚШда Трамп сурати туширилган кроссовка пайдо бўлди
Дональд Трампга суиқасд уюштирилгандан кейиноқ унинг расми туширилган кроссовка собиқ президентга тегишли компания сайтида пайдо бўлди, деб ёзди “USA Today” газетаси.
Пойабзалда АҚШ байроғи тасвирланган, суиқасддан кейин қулоғи атрофи қонга беланган Трамп муштини кўтариб турибди.
5 минг жуфт сотилиши режалаштирилган кроссовканинг нархи 299 доллар. Тасодифий танлаб олинган ўн жуфт пойабзал эса шахсан Трамп имзоси билан сотувга чиқарилади.
С.Раҳимов,
ЎзА