Пойтахтимиздаги “Халқлар дўстлиги” майдонида “Дўстлик оҳанглари” номли концерт дастури пойтахт аҳли ва юртимиз меҳмонлари учун намойиш қилинди.

Мусиқий дастурда эстрада, опера санъати усталари ва Ўзбекистон миллий симфоник оркестри ижросидаги  гала-концерт томошабинлар эътиборига ҳавола этилди.  

Мусиқий анжуманда Миллатлараро муносабатлар ва хорижий мамлакатлар билан дўстлик алоқалари қўмитаси томонидан қатор ҳамкор ташкилотлар билан бирга юртимизда Дўстлик фестивали кўтаринки руҳда ўтказилаётгани қайд қилинди.

Таъкидландики, ушбу фестивалдан кўзланган асосий мақсад жаҳон мамлакатларининг миллатлараро тотувликни таъминлаш борасидаги тажрибаси ва илмий салоҳиятини бирлаштириш, халқлар маданиятини намойиш этиш, чет элдаги ватандошларимиз билан ўзаро манфаатли ҳамкорлик алоқаларини йўлга қўйиш, юртимизда яшаб келаётган барча миллат ва элат вакилларининг маданияти, тили, миллий анъаналари ва урф-одатларини сақлашдан иборат.

Тадбирда иштирокчилар томонидан юртимизда ҳукм сураётган миллатлараро тотувлик ва бағрикенгликни кўз қорачиғидек асраб авайлаш кераклиги хусусида фикрлар билдирилди.

Шундан сўнг йиғилганлар эътиборига таниқли санъаткорлар ва миллий маданий марказлар томонидан тайёрланган концерт дастури ҳавола этилди. Турли миллат ёзувчи ва шоирларининг қаламига мансуб шеърлар асосида куйланган қўшиқлар барчага кўтаринкилик улашди.

[gallery-18577]

Дўстлик фестивали доирасидаги тадбирлар аҳолини, айниқса, ёшларни умуминсоний қадриятларни асраб-авайлаш, турли миллатлар қадриятларига ҳурмат билан қараш руҳида тарбиялашга, шунингдек, жаҳонда самимий дўстлик ғояларини тарғиб қилиш ва тараннум этишга хизмат қилади.

Н.Усмонова,

Алимурод Мамадаминов (суратлар), ЎзА