Юртимизда ёшлар ўртасида соғлом турмуш тарзини қарор топтириш ва ватанпарварлик руҳини кучайтириш мақсадида 2021 йилдан буён Давлат хавфсизлик хизмати кубоги учун футбол ва мини-футбол мусобақалари ўтказиб келинмоқда.
Жорий йилда Қорақалпоғистон Республикаси, барча вилоятлар ва Тошкент шаҳрида ўғил болалар ўртасида футбол, йигит ва қизлар ўртасида эса мини-футбол баҳсларида 251 минг нафардан зиёд ёш қатнашди. Бу кўрсаткич 2022 йилга нисбатан қарийб 15 фоизга кўпдир.
Саралаш босқичлари апрель–май ойларида туман ва шаҳарларда, июнь–июль ойларида эса вилоятлар марказлари ва пойтахтда ўтказилди. Натижада мини-футбол (қизлар, ўғил болалар) ва футболдан 42 та жамоа республика босқичига йўлланма олди. Финалгача баҳслар 19–23 август кунлари «Бунёдкор» футбол академияси майдонларида бўлиб ўтди. Финал эса Тошкент шаҳридаги «Жар» стадионида ташкил этилди.
Футбол бўйича ҳал қилувчи беллашувда Сирдарё вилоятининг Янгиер шаҳридаги Абдураҳмон Жомий маҳалласи жамоаси Қашқадарё вилоятининг Касби туманидаги "Қоратепа" жамоасига қарши майдонга тушди. Иккинчи таймнинг 37-дақиқасида янгиерлик Алишер Собиржонов рақиб дарвозасига аниқ зарба йўллаб, жамоасига ғалаба келтирди.
– Бу гол фақат менинг эмас, бутун жамоамнинг меҳнати самараси, – дейди Алишер Собиржонов. – Биз охирги дақиқаларгача бирдамлик билан курашдик. Кубокни қўлга киритишимиз бутун Янгиер ёшлари учун катта рағбат бўлади.
Шу тариқа, Абдураҳмон Жомий маҳалласи ёшлари илк бор ДХХ кубогини қўлга киритиб, Сирдарё футболи тарихида муҳим саҳифа очди. 2021 йилда Гулистон шаҳри "Тараққиёт" маҳалласи иккинчи ўринни эгаллаган, 2022 йилда эса Мирзаобод туманининг "Боғистон" жамоаси финалгача етганди. Кейинги икки йилда эса ҳеч қайси Сирдарё жамоаси ҳал қилувчи босқичга чиқолмаган эди.
Чемпионлар Янгиер шаҳрига қайтгач, уларни шаҳар аҳли, Сирдарё вилояти Ёшлар ишлари ва Спорт бошқармаси ҳамда Ўзбекистон маҳаллалари уюшмаси шаҳар бўлимининг ходимлари тантанали равишда кутиб олишди. Шаҳар ҳокими Отабек Носиров футболчиларни табриклар экан, бу ғалаба барча сирдарёлик ёшлар учун намуна бўлишини таъкидлаб ўтди.
Мусобақа ғолиблари учун махсус совға сифатида Абдураҳмон Жомий маҳалласида замонавий мини-футбол майдони барпо этилади. Демак, янгиерлик чемпионлар нафақат кубок, балки ўз маҳалласига ҳам қимматли инфратузилмавий ютуқ олиб келишди.
Ғулом Примов, ЎзА мухбири