Айни кунларда жойларда Ўзбекистон Республикаси Олий Мажлиси Қонунчилик палатаси депутатлари ўзлари сайланган ҳудудларда сайловчилари билан учрашмоқда.
Қонунчилик палатаси депутати Гулжан Халмуратованинг ҳам сайловчилар билан учрашувининг дастлабки манзили энг чекка ҳудудларнинг бири бўлган Қўнғирот туманида ташкил қилинди. Халқ вакили ижтимоий соҳа объектларидан Қўнғирот туманида янгидан қад кўтарган “Klinika alyan” хусусий тиббиёт клиникасининг очилиш маросимида иштирок этди.
Тадбирда мамлакатимизда сўнгги йиллари барча соҳалар сингари тиббиёт соҳасига қаратилаётган эътибор, айниқса, чекка ҳудудлар аҳолисининг саломатлигини мустаҳкамлаш йўлида қилинаётган ишлар, шу жумладан, замонавий биноларнинг қад кўтарилиши бу борада муҳим аҳамият касб этишини таъкидлади. Бундан ташқари, депутат кенг жамоатчилик вакилларини муборак Рамазон ойи билан самимий табриклаб, барча эзгу тилакларни билдирди.
Сўнг халқ вакили мазкур марказда беморлар учун яратилган қулайликлар, тиббиёт ходимларининг иш фаолияти ҳамда марказнинг моддий-техник базаси билан танишди. Ўрганишлар давомида тиббиёт масканига қўшни Қонликўл ва Шуманай туманлари аҳолиси ҳам келиб замонавий аппаратлардан текширувдан ўтаётгани эътироф этилди.
Халқ вакилининг кейинги манзили “Таллиқ” маҳалла фуқаролар йиғини бўлди. Маҳалла аҳли билан бўлган самимий суҳбат жараёнида депутат мамлакатимизда аҳоли фаровонлигини таъминлаш, тинчликни асраш, ҳар бир хонадон, фуқаро билан ишлаш борасида амалга оширилаётган чора-тадбирлар тўғрисида маълумот берди. Бундан ташқари, аҳолини қийнаб келаётган муаммолар бўйича уларнинг мурожаатлари, фикр ва таклифлари ҳам тингланди.
Сайловчиларнинг ҳудуддаги ичимлик суви, суюлтирилган газ, электр энергияси, ички йўлларни таъмирлаш, бандлик каби ўндан ортиқ мурожаати тингланди ва мутасаддилар иштирокида атрофлича муҳокама қилинди.
Депутат томонидан аксарият муаммолар шу ернинг ўзида туман Кенгаши депутатлари, маҳалла еттилиги ва тегишли соҳа вакиллари билан ҳамкорликда муҳокама қилиниб, ичимлик сув муаммоси жорий йил дастурига киритилиши ва йил якунига қадар ижобий ҳал қилиниши, ички йўлларни таъмирлаш масаласи туман Ободонлаштириш бошқармаси билан биргаликда ҳал этилишига келишиб олинди.
Шунингдек, қонунчилик палатаси депутати Гулжан Халмуратова туман Кенгаши депутатлари билан ҳам учрашди. Мулоқотлар чоғида партиянинг маҳаллий Кенгаш депутатлари фаолиятини кенгайтириш, жамоатчилик назорати тадбирларини кучайтириш, ижтимоий соҳалардаги муаммо ва камчиликларни бартараф этиш масалалари муҳокама қилинди. Шунингдек, ўрганишлар жараёнида фуқаролардан келиб тушаётган мурожаатлар асосида сессияларга масалалар киритиб бориш, депутатлик сўровларини ташкил этиш каби бир қатор масалалар ҳам эътибордан четда қолмади.
Олий Мажлис Қонунчилик палатаси депутати шунингдек, Қонликўл, Тўрткўл туманлари ва Нукус шаҳрида бўлиб, аҳоли билан ҳам учрашди.
Довуд Абибуллаев, ЎзА мухбири