Яйловларимизда яшнаб турган бу йилги ўт-ўланлар бугун чорвадорларимизни беҳад қувонтирмоқда. Зеро, баҳорнинг серёғин келиши чорвачиликда йил яхши келганидан далолатдир. Аслида чорвачилик йирик ва сердаромад тармоқ. Соҳанинг ривожи аввало халқимиз дастурхонининг тўкис бўлишини таъминлайди.

Жумладан, жорий йилнинг биринчи чорагида Сирдарё вилоятида салкам 16 минг тонна гўшт, 60 минг тоннага яқин сут тайёрланди. Қорамол бош сони 500 мингга яқинлашди. Шу билан бирга соҳада умумий қиймати   8.1 млрд. сўмлик 8 та лойиҳа амалга оширилмоқда.

- Бугунги кунда Сирдарё вилоятида 1241 нафар чорвачилик соҳасида фаолият юритаётган фермерлар мавжуд бўлиб, шундан 727 нафари қорамолчилик билан шуғулланиб келишмоқда, - дейди Сирдарё вилояти ветеринария ва чорвачиликни ривожлантириш бошқармаси бошлиғи ўринбосари Исмоил Раҳмонов. – Ушбу фермерларга 24.5 минг гектар ер майдони ажратилган бўлиб, шундан бу йил ҳисобига 4.5 минг гектарига силосга маккажўхори экилади. 66та чорвачиликни ривожлантириш лойиҳаларимиз бор. Шундан 37таси айнан қорамолчилик соҳасига тегишли. Четдан 3800 бош наслли қорамол олиб келиш режалаштирилган.    

Давлатимиз раҳбарининг 2023 йил 24 августдаги “Чорвачиликда идентификация қилиш тизими ва наслчилик соҳасини такомиллаштиришга оид қўшимча чора-тадбирлар тўғрисида”ги қарорига асосан вилоятда чорвачиликка ихтисослаштирилган кластер ташкил этиш бўйича йўл харитаси ишлаб чиқилди ва тасдиқланди. Натижада вилоятдаги пахта-тўқимачилик кластерларида чорвачилик мажмуалари барпо этилмоқда. Ҳозирда Сардоба ва Сайхунобод туманларида қурилиш ишлари бошлаб юборилган. Энг муҳими кластерларда чорва парвариши учун кенг имкониятлар мавжуд бўлиб, уларнинг соҳага кириб келиши тармоқ ривожига хизмат қилади. Жумладан, чорвачилик кластерини ташкил этиш истагини билдиган Сардоба туманидаги “Sardoba universal klaster” маъсулияти чекланган жамияти томонидан 10 гектардан зиёд майдонда жойлашган, банкротлик ёқасига келиб қолган чорвачилик мажмуасини сотиб олиб, қайта ташкил этди. Бугунги кунда 545 бош “Симментал” ва “Голштин” зотли қорамол ҳамда 700 бош қўй ва эчки парваришланмоқда.  Хўжаликка қарашли 600 гектар майдонда чорва озуқаси етиштирилиб, тўлиқ ўз эҳтиёжларини қоплаб келмоқда.  

Эътиборли томони ҳар бир зотли қорамол ўртача 600-800 килограммгача тош босади. Йилига 200-250 бошгача наслли бузоқ олинади. Чорва бош сонини мингдан ошириш режа қилинган.  

Бир вақтнинг ўзида 28 бош сигирга мўлжалланган сут соғиш цехида кунига 4 тоннага яқин маҳсулот олинади ва шу ернинг ўзида 3 суткагача совутиб сақлаш имкони яратилди.  

Бундан ташқари кластер лойиҳа қиймати 7.5 млрд. сўмни ташкил этган, кунига 6 тонна сутни қайта ишлайдиган корхонани шу кунларда ишга тушириш ниятида. Натижада  хўжалик ўз маҳсулотларини тўлиқ қайта ишлайди. Бир сўз билан айтганда соҳага молиявий асоси мустаҳкам кластерларнинг кириб келиши келгусида маҳсулот таннарҳида барқарорликка эришишга, илм-фан ва амалиёт уйғунлигига, чорва наслининг яхшиланишига хизмат қилади.  

<iframe width="640" height="360" src="https://www.youtube.com/embed/F90XZxAMTDU" title="Chorvachilik tarmogʻi kengaytiriladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов,  

Аслиддин Алижонов,  

Улуғбек Тўхтаев(видео), ЎзА