Маълумки, яқинда Хорватиянинг Загреб шаҳрида бўлиб ўтган жаҳон чемпионатида юнон-рум кураши бўйича Тошкент вилояти фарзанди Айтжан Халмаханов олтин медални қўлга киритган эди.

Бундай ютуқ билан у 24 йиллик танаффусдан сўнг мазкур йўналишда жаҳон чемпиони бўлган илк ўзбекистонлик спортчи сифатида тарихга муҳрланди. 

Шу муносабат билан чемпионга давлатимиз раҳбари томонидан “Nurafshon Sity” ҳудудида жойлашган кўп қаватли уйлардан уч хонали хонадон топширилди. Тадбирда вилоят ва Нурафшон шаҳри, Ўрта Чирчиқ тумани фаоллари, нуронийлар ва ёшлар, спортчининг оила аъзолари ва яқинлари иштирок этди. Барча биргаликда янги хонадонда меҳмон бўлди. 

Вилоят ҳокими З.Мирзаев фаоллар билан бирга спортчи ва оила аъзолари билан суҳбатлашиб унинг ютуқларини эътироф этди,  келгуси фаолиятига омад тилади. Ёш спортчининг халқаро майдонларда  юртимиз шаънини юксак даражада ҳимоя қилаётгани, юксак марралар сари интилиб, ёшлар учун катта ибрат ва ўрнак намуналарини кўрсатаётгани алоҳида таъкидлади. 

– Аввало, Президентимизга, халқимизга катта раҳмат, – дейди Айтжан Халмаханов. – Эришаётган ютуқларимдан устозларим, ота-онам ва оиламдагилар жуда мамнун бўлишди. Бу менга катта масъулият юклайди. Бундан кейин ҳам янада катта ишонч билан ҳаракат қиламан. Олдинда навбатдаги Олимпиада ўйинларида ҳам юқори натижаларга эришиш ниятидаман. 

Тадбир давомида фаоллар ҳам ўзларининг илиқ тилакларини билдирди. Нуронийлар дуо қилиб, спортчининг келгуси фаолиятига омад тилади. 

А.Мусаев, ЎзА