Қирғизистон Республикаси Бишкек шаҳрида от спортининг тўсиқлардан сакраш ва от йўрттириш йўналиши бўйича ўтаётган Жаҳон кубогининг 3-саралаш босқичида ўзбекистонлик икки нафар чавандоз ғолиблик шоҳсупасига кўтарилди.

Жаҳон кубогининг 120 сантиметр баландликдаги тўсиқлардан сакраш баҳсларида ҳамюртимиз Бекзод Қурбонов «Santos Xeppika» лақабли оти билан ғолибликка эришди. Ҳамюртимиздан ортда қолган қирғизистонлик Андрей Тряписин 2-ўринни, қозоғистонлик Аян Ганига эса 3-поғона насиб этди.

Мусобақада 140 сантиметр квалификация берувчи Гран-При беллашувларида Бекзод Қурбонов «Matts» лақабли отида 59.15 сония натижа кўрсатиб, олтин медални қўлга киритган бўлса, Хуршидбек Алимжонов «Chempions League» лақабли отида кумуш (59.77 сония) медалга сазовор бўлди.

От йўрттириш баҳсларида Ўзбекистон терма жамоаси аъзоси Алёна Деревянко «Red Daymond» лақабли тулпори билан 67,142 % натижага эришиб, бронза медали соҳибига айланди.

Мазкур нуфузли мусобақада ҳозирча 2 та олтин, 1 тадан кумуш ва бронза медалига эга бўлган мамлакатимиз спорт шарафини Ўзбекистон Йилқичилик ва от спорт федерацияси раиси Баҳромжон Газиев етакчилигидаги 6 нафар спортчимиз ҳимоя қилмоқда.

Т. Рўзиев, ЎзА