Сурхондарё вилояти Бойсун туманида ўтказилаётган “Бойсун баҳори” халқаро фольклор фестивали доирасида миллий қадриятларимизнинг бир бўлаги, тўю тантаналаримиз безаги бўлган улоқ-кўпкари мусобақаси ҳам ташкил этилди.

Даштиғоз қишлоғи ҳудудидаги адирликда бўлиб ўтган шиддатли беллашувда юртимизнинг энг чапдаст чавандозлари қатнашиб, қизиқарли кўнгилочар томошаларни туҳфа этди. Кучли, эпчил,  отларининг чопқирлиги билан чавандозлар мухлисларига ўзгача завқу шавқ улашди.  

Адирликда тўдадаги чавандозлар улоқни ердан кўтариб олиб, тортишиб, энг кучлилари белгиланган маррага олиб келди. Ўйиннинг ҳалол ўтишини тажрибали баковуллар кузатиб борди.  

Энг қадимий ва қизиқарли спорт ўйинларимиздан бири бўлган улоқ-кўпкари мусобақасига соврин сифатида қўйилган нор туяларни сурхондарёлик чавандозлар, жумладан, шўрчилик Одил чавандоз, бандихонлик Жуманазар чавандоз, термизлик Беҳзод чавандоз, қумқўрғонлик Ҳусниддин чавандозлар қўлга киритди. Шунингдек, чаққон ва эпчил 22 чавандоз от, ҳўкиз, қўй, сарка, телевизор каби зотларга эгалик қилди.  

Улоқ-кўпкари мусобақасида мамлакатимизнинг турли ҳудудларидан келган юздан ортиқ чавандоз ўз маҳорати, эпчиллиги, довюраклиги ва отларининг чопқирлигини намойиш этди.  

Холмўмин Маматрайимов,  

ЎзА мухбири