Кўпинча 2-3 ойлик чақалоқларда кўп терлаш кузатилса, оналар болам рахит бўлиб қолмадимикан, деган хавотирга тушади. Айримлари шифокорга мурожаат қилса, баъзилар ўзларича ёки атрофдагиларнинг турли хил тавсияларига қараб, фарзандини даволашга киришади. Хўш, аслида бола нима учун терлайди? Боланинг кўп терлаши касалликми?

– Янги туғилган болаларнинг кўп терлашига иккита сабаб бор. Биринчиси, уларни ўта қалин кийинтириш, иккинчиси, боланинг кўп ҳаракатланиши. Айрим чақалоқлар ётган жойида ҳам оёқ-қўлларини тинимсиз ҳаракатлантириб, жуда фаол бўлади. Кўпчилик боланинг кўп терлаши сабаби рахит ёки витамин «Д» етишмаслиги деб ўйлаб, жуда катта дозада витамин «Д» беришни бошлайди. Энг ёмони, болада ҳеч қандай текширувлар ўтказмасдан дори беради. 

Витаминларни ҳам мутлақ фойдали деб фикрлаш нотўғри. Чунки витаминлар кўпайиб кетса, айниқса, ёғда эрийдиган «А»,»Д»,»Е», «К» витаминлари организмда тўпланиб, уни заҳарлаши натижасида болада кўнгил айниб қусиш, уйқу бузилиш ҳолатларини келтириб чиқариши мумкин. Ундан ташқари витамин «Д» кўпайиб кетса, болада қабзият кузатилади. Шунинг учун болага витаминни энг аввало, таҳлил топшириб, натижалар чиққач, шифокор тавсияси ва назорати остида бериш зарур, – дейди оилавий шифокор Зиёд Фатхуллаев.

<iframe width="650" height="420" src="https://www.youtube.com/embed/aE-As9Ha2ck" title="Bola koʻp terlasa raxit boʻladimi?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Н.Раҳмонова, ЎзА