Ҳаваскор боксда Олимпия ўйинлари ва жаҳон чемпиони бўлган Баҳодир Жалолов профессионал боксдаги ўн олтинчи жангини жорий йилнинг 6 октябрь куни ўтказадиган бўлди.

Аниқроқ айтадиган бўлсак, боксчимиз шу куни Россиянинг Санкт-Петербург шаҳрида ўтказиладиган “IBA.PRO (https://iba.pro/)” бокс оқшомида рингга кўтарилади. Унга россиялик 36 ёшли чарм қўлқоп устаси Виталий Кудуков қаршилик кўрсатади. Дарвоқе, В.Кудуков айни дамда профессионал рингда 10 та жанг ўтказиб, уларнинг 7 тасида ғалаба қозонган ва 3 тасида мағлубият аламини тотган.

Маълумот ўрнида: Баҳодир Жалолов ўзининг сўнгги жангини апрель ойида украиналик Игорь Шевазуцкийга қарши ўтказиб, очколар ҳисобига кўра зафар қучган эди. Шундан сўнг, чарм қўлқоп устамиз  27 июль куни АҚШнинг Нью-Йорк шаҳрида ўтказиладиган профессионал бокс кечасида италиялик рақиби Жанмарко Кардильо билан рақобатлашиши таъкидланган эди. Бироқ, Жанмарко Кардильонинг соғлиғидаги муаммолар сабаб жанг ўтказилмади.

Жавоҳир Тошхўжаев,

ЎзА