БМТ Россия ва Украина ўртасида тўғридан-тўғри музокара ўтказиш ва 30 кунлик ўт очишни тўхтатиш ташаббусини олқишлайди, деди Бош котиб вакили Стефан Дюжаррик.

– Албатта, 30 кунлик тинишга қаратилган сўнгги ташаббус, РФ ва Украинанинг бевосита музокара олиб бориш қарори бизни беҳад қувонтирди, деди у журналистлар учун ташкил қилинган брифингда.

Куни кеча Президент Владимир Путин Украинага 15 май куни Истанбулда ҳеч қандай шартсиз тўғридан-тўғри музокара таклиф қилди. Давлат раҳбари мулоқот давомида томонлар урушни тўхтатишга келишиши мумкинлигини истисно этмади. Матбуот котиби Дмитрий Песков таъкидлашича, Москва тинч йўл билан узоқ муддатли битимга эришиш йўлини топишга жиддий бел боғлаган. Таклиф этилаётган музокарадан кўзланган мақсад эса можаронинг асл сабабини аниқлаш ва бартараф этиш, Россия манфаатини таъминлашдан иборат.Украина етакчиси Владимир Зеленский эса РФ яна бир бор номақбул шартлар илгари сура бошлаганини таъкидлаб, Москва 12 майдан бошлаб ўт очишни тўлиқ тўхтатишга рози бўлсагина, Киев музокара даврасига қўшилишини билдирди.

АҚШ Президенти Дональд Трамп Киев расмийларини Путиннинг таклифига зудлик билан рози бўлишга чақирди. Америка раҳбари фикрича, бундай музокара ҳеч бўлмаганда “келишувга эришиш мумкинми ўзи”, деган саволга жавоб олиш имконини беради.

Кейинроқ Зеленский рус ҳамкасбини пайшанба куни Туркияда кутишини айтди.

Таъкидлаш жоиз, Президент Режеп Таййип Эрдоған Украина ва Россия мулоқотини ҳар доим қўллаб-қувватлаган. Бу гал ҳам Зеленский билан телефон орқали мулоқоти чоғида айни истак “ўта муҳим”лиги, жараёнга Туркия ҳар босқичда ёрдам беришини тасдиқлади.

– 2022 йил март ойида Россия – Украина инқирозига ечим топишга жуда яқин эдик, бироқ “уруш баронлари” аралашуви билан уринишимиз барбод бўлди, – деди Туркия раҳбари душанба куни Вазирлар Маҳкамаси йиғилишидан кейин халққа қилган мурожаатида. – Мана энди Россия, Украина ва Қўшма Штатлар музокара зарурлиги бўйича келишиб олди. Барча томонлар ишончини қозонган ягона давлат сифатида биз яна бир бор таъкидладикки, тинчлик музокарасига ҳисса қўшишга тайёрмиз. Ишонамизки, бу галги  ҳаракатимиз беҳуда кетмайди.

Шунингдек, Туркия раҳбари сешанба куни Истанбулда НАТО Бош котиби Марк Рютте билан ҳам бўлажак музокарани муҳокама қилиши мумкин, деган Анқарадаги дипломатик манба “РИА Новости” мухбирига.

Туркия раҳбарининг НАТО Бош котиби билан суҳбати сешанба куни Анқарада ўтказилиши режалаштирилган. Оммавий ахборот воситалари вакилларидан холи ўтказиладиган мулоқот кун тартибига Россия – Украина зиддияти ва кутилаётган музокара жараёни киритилиши эҳтимоли юқори.

Ғарбнинг етакчи давлатлари, жумладан Франция, Германия, Италия, Польша, Испания ва Буюк Британия ташқи ишлар вазирлари ҳамда Европа Иттифоқи дипломатияси раҳбари Кая Каллас Лондондаги учрашувдан сўнг ўз позициясини қуйидагича баён қилди: Улар “30 кунга ўт очишни тўлиқ ва шартсиз тўхтатиш”ни  қўллаб-қувватлашларини билдирди.

– АҚШ етакчилигидаги тинчлик саъй-ҳаракати ва кейинги музокара истиқболини олқишлаймиз, – дейилган Буюк Британия ТИВ учрашув якуни бўйича эълон қилган баёнотда. – Биз адолатли, кенг қамровли ва мустаҳкам тинчлик учун майдон яратиш мақсадида ўт очишни 30 кунга зудлик билан, тўлиқ ва сўзсиз тўхтатишга чақиришга қўшилдик.

Шунингдек, вазирлар Украинани қурол-яроқ ва ўқ-дори билан таъминлаш давом этиши, мамлакатга “хавфсизлик кафолати” тақдим этиш мажбурияти олиниши зарурлигини таъкидлашди.

– Бу ҳаво, қуруқлик ва денгиз кучлари коалициясини яратиш имкониятини ифодалайди, – дейилган баёнотда.

С.Раҳимов,ЎзА