АҚШда ўтаётган футбол бўйича клублар ўртасидаги жаҳон чемпионатида "C" ва "D" гуруҳларида иккинчи тур баҳслари якунланди.

"D" гуруҳида Бразилиянинг "Фламенго" жамоаси Англиянинг "Челси" клубини 3:1 ҳисобида мағлуб этди. Шунингдек, ушбу гуруҳда ўтган бошқа баҳсда Туниснинг "Эсперенс" жамоаси АҚШ вакили "Лос-Анжелес" устидан 1:0 ҳисобида ғалаба қозонди.

Бу натижалардан сўнг "Фламенго" 6 очко билан гуруҳ пешқадами сифатида муддатидан олдин кейинги босқичга йўл олди. "Челси" ва "Эсперенс" 3 тадан очко билан 2–3-ўринларни бўлишмоқда. "Лос-Анжелес" эса 2 та мағлубиятдан сўнг сўнгги ўринга тушиб қолди.

"C" гуруҳида эса Германиянинг "Бавария" клуби Аргентинанинг "Бока Хуниорс" жамоасини 2:1 ҳисобида мағлуб этди ва 6 очкога эга бўлиб, гуруҳда етакчиликни қўлга киритди. Бу ғалаба билан "Бавария" ҳам 1/8 финалга йўлланмани нақд қилди. "Бока Хуниорс" эса 1 очко билан 3-ўринда қолди.

Португалиянинг "Бенфика" клуби эса Янги Зеландиянинг "Окленд Сити" жамоаси устидан 6:0 ҳисобида ғалаба қозониб, 4 очко билан иккинчи ўринга чиқди. "Окленд Сити" икки ўйинда жами 16 та гол ўтказиб юбориб, гуруҳда аутсайдерга айланди.

Бугун ва эртага навбатдаги баҳслар ўтказилади

Турнир доирасида бугун ва эртага "E" ҳамда "F" гуруҳларида иккинчи тур ўйинлари бўлиб ўтади:

"F" гуруҳи:

"Мамелоди Сандаунз" – "Боруссия Дортмунд" (21:00)

"Флуминенсе" – "Ульсан" (03:00)

"E" гуруҳи:

"Интер" – "Урава Ред Даймондс" (00:00)

"Ривер Плейт" – "Монтеррей" (06:00)

Жавоҳир Тошхўжаев, ЎзА