Ўзбекистон Ёзувчилар уюшмасида “Меҳнат шуҳрати” ордени соҳиби, уюшма аъзоси Барот Исроилнинг “Aсрийнома ёхуд Баротийнома” деб номланган китоби тақдимоти бўлиб ўтди.

Ёзувчилар, шоирлар, ёш ижодкорлар ва адабиёт ихлосмандлари иштирок этган тадбирни уюшма раиси Сирожиддин Саййид очиб берди.

– Адабиёт ва маънавиятга эътибор кучайган мамлакатимизда ижод аҳлининг асарларини нашр этишга, уларни маънавий жиҳатдан руҳлантириш ва янгидан янги асарлар яратишга чорлаш бўйича тизимли ишлар олиб борилмоқда, – деди Ўзбекистон Ёзувчилар уюшмаси раиси, халқ шоири Сирожиддин Саййид. – Бу каби китобларнинг тақдимот тадбирлари китобхонликни янада оммалаштиришга, ёш авлодда миллий адабиётимизга бўлган меҳр ва қизиқишни кучайтиришга қаратилгани билан аҳамиятлидир.

Янги китоб тақдимотида Барот Исроил ижодининг ўзига хослиги хусусида атрофлича сўз юритилди.

[gallery-19355]

Тарихий воқеалар, Турон мамлакатида биринчи ва иккинчи уйғониш даври вакиллари, учинчи уйғониш даврининг тамал тошини қўйиш йўлида изланаётган фидойи замондошлар ҳақида лавҳалар ҳамда "Кундалик дафтари"га киритилган ёзувлар, "Ҳаётнинг заҳматлари – Умримнинг ҳикматлари" дафтарига қайд этилган маълумотлар ва сўнгги йилларда ёзилган янги асарлар асосида "Танланган асарлар"нинг бешинчи китоби бунёд этилди.

Китоб “Ворис нашриёти”да чоп этилган. Ушбу янги нашр 110 та бўлимдан иборат бўлиб, унда адибларнинг ҳаёти ва ижоди, шеърлар, ғазаллар ўрин олган.

Ўзбекистон Ёзувчилар уюшмаси ахборот хизмати тақдим этган маълумотларга кўра, Барот Исроил 1938 йилда Тошкент вилоятининг Ўрта Чирчиқ (ҳозирги Оҳангарон) туманида туғилган. 1956 йилда Тошкент шаҳридаги 1-сонли босмахонада иш фаолиятини бошлаган. Айни шу йилларда унинг “Имтиҳон” шеъри ўзи яшаётган тумандаги “Машъал” газетасида эълон қилинган.

Барот Исроил Тошкент давлат педагогика институтида (1960–1966) таҳсил олгач, ҳозирги “Тонг юлдузи” газетасида (1966–1970), сўнгра Ўзбекистон телерадиокомпаниясида хизмат қилган. Шоирнинг илк “Бойчечак” китоби Ўзбекистон халқ шоири Миртемирнинг сўзбошиси ва муҳаррирлигида 1972 йилда нашр этилган. Шундан сўнг “Най навоси” (1976), “Оқ булут” (1979), “Оқ олтин” (1980), “Баҳор” (1982), “Субҳидам” (1985), “Ширин кулча” (1989), “Настарин” (1992), “Тўйтепага тўйга келинг” (1997), “Алишернинг ширин тили” (1998) сингари мажмуалари ва Нажмиддин Кубро ҳақидаги “Туронлик авлиё” асари дунёга келди.

Ижодкорнинг болалар учун ёзилган “Эр ва шеър” достони асосида “Ҳайвонлар султони” номли опера, “Алишернинг ширин тили” достони асосида радиоспектакль яратилган. Беш жилдлик танланган асарлари ҳам чоп этилган. Барот Исроил Николай Некрасов, Собит Муқанов, Расул Ҳамзатов, Жўлмирза Оймирзаев каби қардош халқлар шоирлари ижодидан намуналарни ўзбек тилига таржима қилган.

Тадбирда Барот Исроил ижоди ва унинг янги китоби хусусида батафсил сўз юритилди.

Н. Усмонова, Ойбек Пардаев (сурат), ЎзА