Индонезиянинг Бали курорт ороли яқинида 65 кишини олиб кетаётган паром чўкиб, камида беш киши ҳалок бўлди, ўнлаб одам бедарак йўқолди.

“Basarnas” қидирув-қутқарув агентлиги маълум қилишича, “KMP Tunu Pratama Jaya” кемаси чоршанба куни кечқурун Шарқий Явадаги Баньюванги портидан чиққач, кўп ўтмай чўкиб кетган. Омон қолгани тахмин қилинганлар қидириляпти. Расмийларга кўра, вертолёт ва 15 та кема иштирок этган қутқарув амалиёти самараси ўлароқ, 35 киши хавфсиз жойга ўтказилди.

– Кема тўлиқ чўккан, – деди Сурабая қидирув-қутқарув хизмати раҳбари Нананг Сигит. – Паром ичида одамлар бўлиши эҳтимоли бор, лекин ҳозир асосий эътибор сув юзасига қаратилган. Қурбон бўлган беш кишининг жасади оиласига етказилади. Эрталаб денгиз ва об-ҳаво шароити меъёрига келди, тирикларни қидириш осонлашди.

Баньюванги полицияси бошлиғи Рама Самтама Путра айтишича, омон қолганларнинг кўпчилиги бир неча соат океанда қолиб кетиши туфайли ҳушидан кетган.

– Саудия Арабистонига ташриф билан кетган Президент Прабово Субианто зудлик билан фавқулодда чоралар кўришни буюрди, – деди Вазирлар Маҳкамаси котиби Тедди Индра Вижая ва ҳалокатга ноқулай об-ҳаво сабаб бўлганини қўшимча қилди.

М.Пирматова, ЎзА