![](https://cdn.uza.uz/2021/04/09/14/58/3nPIy7FjFAZyzDTTmTZwDnpYdsH6cO9x_normal.jpg)
Сирдарё тумани бободеҳқонлари ҳавонинг очиқ ва илиқ кунларидан ҳамда ернинг оби-тобида етилганидан фойдаланиб, чигит экиш ишларини уюшқоқлик билан олиб бормоқда.
Жорий қишлоқ хўжалиги мавсумида Сирдарё туманида бу йил 8 минг гектарга чигит қадалади. Шундан, 7 минг 300 гектарига “Султон” ва 700 гектарига “С-6524” навлари экилиши режалаштирилган.
Экиш майдонига етарли 288 тонна сифатли чигит тайёрлаб қўйилиб, чигит тарқатиш шохобчалари орқали фермер хўжаликларига етказиб берилмоқда.
– Мавсумда чигит экиш ишларини унумли ташкил этиш, тез ва сифатли экиб олишини таъминлаш мақсадида – туманда 49 та ҳайдов, 126 та чопиқ тракторлари, 126 та култиватор, 62 та сеялка, 44 та пуркагич, 24 та минерал ўғит сепгич, 14 та ер текислагич, 98 та чизел ва 908 та тишли борона таъмирлашдан чиқарилиб, экишга шай ҳолатга келтирилиб, “Ўагроинспекция”нинг махсус сертификатлари берилган, – дейди “Ўзагроинспекция”нинг Сирдарё туман бўлим бошлиғи Баҳодир Қурбонов.
– Об-ҳаво яхшилигидан фойдаланиб чигитни тез кунларда сифатли экиб олиш учун 27 та отряд ташкиллаштирилиб, экиш ишлари доимий назоратга олинган.
Туманнинг ҳар бир ҳудудида қишлоқ хўжалиги техникларига техник хизмат кўрсатиш мобил гуруҳлари ташкил этилиб, ёқилғи-мойлаш материалларини чигит экилаётган дала майдонига етказиб бериш тизими яратилди.
Ҳозирда туманнинг барча деҳқон фермер хўжаликларида ерга уруғ қадаш ишлари қизғин олиб борилмоқда. Айни пайтга келиб туман бўйича 2 минг гектардан ортиқ майдонга чигит экиб бўлинди.
А.Қаюмов, ЎзА