Англиянинг Ливерпуль шаҳридаги “Bank Arena” мажмуасида бокс бўйича катталар ўртасида ўтказилаётган жаҳон чемпионати ўзбек чарм қўлқоп усталари учун омадли давом этмоқда.

Дунё биринчилигининг навбатдаги кунида терма жамоамизнинг беш нафар вакили рингга кўтарилди. Улар орасида вазни -55 кг. бўлган Миразизбек Мирзахалилов ҳиндистонлик Паван Бартвалга қарши ўтган жангда 5:0 ҳисобида зафар қучган бўлса, Олимпия ўйинлари ғолиби Асадхўжа Мўйдинхўжаев -65 кг. вазн тоифасида хитойлик Жианхао Жуга ҳеч қандай имконият қолдирмади.  

Шунингдек, иқтидорли боксчимиз Жавоҳир Умматалиев -80 кг.да Польша вакили Никодем Козакдан ҳар томонлама устун эканини исботлади.

Қизлар ўртасида -70 кг. вазнда мамлакатимиз шарафини ҳимоя қилаётган Азиза Зокирова венгриялик Регина Лакосни учинчи раундда техник нокаутга учратди. Шунингдек, -57 килограмм вазн тоифасида Хуморабону Мамажонова черногориялик Бояна Гойковични 5:0 ҳисобида енгди.

Бугун, 8 сентябрь куни Ўзбекистон терма жамоасининг 7 нафар вакили навбатдаги жангларини ўтказади. Қуйида боксчиларимизнинг рақиблари билан танишасиз:

-54 кг: Нигина Ўктамова – Ханна Лакотар (Венгрия)

-65: Навбаҳор Ҳамидова – Ошин Дериюв (Бельгия)

-60: Абдумалик Халаков – Жузеппе Канонико(Италия)

-70 кг: Шавкатжон Болтаев – Франк Мартинез (Испания)

-75 кг: Фазлиддин Эркинбоев – Султон Усмонали (Туркия)

-90: Тўрабек Ҳабибуллаев – Вагкан Нанитзаниан(Греция)

+90: Жаҳонгир Зокиров – Никита Путилов (Германия)

Жавоҳир Тошхўжаев,

ЎзА