Президентимиз томонидан 2022 йил 13 июлдаги “Халқаро тикланиш ва тараққиёт банки ҳамда Халқаро тараққиёт уюшмаси иштирокида “Қишлоқ тадбиркорлигини ривожлантириш иккинчи фаза” лойиҳасини амалга ошириш чора-тадбирлари тўғрисида”ги қарори қабул қилинган.

Мазкур лойиҳа доирасида, қишлоқ ҳудудларида оғир шароитда яшаётган аёлларни иқтисодий билим ва салоҳиятларини ошириш, тадбиркорлик фаолиятларини амалга оширишлари учун кўмаклашиш, хусусан, янги бизнес ишини бошлашда кўпроқ қийинчиликларга дуч келаётган кам таъминланган аёллар бошчилигидаги тадбиркорликни қўллаб-қувватлашга қаратилган ишларни амалга оширилиши белгиланган.

Лойиҳа доирасида жумладан, Бухоро вилоятида Олот ва Пешку туманларидан йил давомида эҳтиёжманд оилалардан жами минг нафар ташаббускор аёл гуруҳларга бўлиниб, тадбиркорликка ўқитилиб, уларга ўз йўналишлари бўйича мутахассислик сирлари ўргатилмоқда.

Бунинг учун биринчи навбатда, гуруҳлар жойлашган маҳаллада қандай тадбиркорлик шароитлари борлиги аниқланади ҳамда аёлларга лойиҳа томонидан танланган ташкилот орқали олти ой давомида иқтисодий ночорликдан чиқариш бўйича амалий кўмак берилади.

Иштирокчиларга индивидуал бизнес маслаҳатлари, тренинглар, менторлик ва халқаро методика асосида ишлаб чиқилган амалий инструментлар тақдим этилмоқда. Бу лойиҳанинг мақсади қишлоқ аёллари орасида тадбиркорлик учун қулай шароит яратиш, кичик бизнесни молиялаштириш, ўқитиш ва бозорга чиқиш билан боғлиқ тўсиқларни бартараф этиш ҳамда истиқболли бизнес ғояларни муваффақиятли корхоналарга айлантиришга ёрдам беришдир.

Мазкур тадбир “Жаҳон банки”, Бухоро вилояти ҳокимлиги, Қишлоқ тадбиркорлигини ривожлантириш “иккинчи фаза” лойиҳаси ҳамда “Эквита Италия” халқаро консультация компанияси кўмаги билан Бухорода бўлиб ўтди. 

Тадбирда ҳамкор ташкилотлар, Олот ва Пешку туманларидаги хотин-қизлар фаоллари, аёллар дафтарига киритилган фуқаролар, Савдо-саноат палатаси, Бандлик бошқармаси, “Тадбиркор аёл” ассоциацияси, хотин-қизлар тадбиркорлик маркази масъуллари иштирок этди.

Зариф Комилов, ЎзА мухбири.