![](https://cdn.uza.uz/2024/02/01/17/04/PpAyIpUKe5k0PExiJz27Qe81hSaVosnn_normal.jpg)
Марказий Осиё халқаро институти (МОХИ)да Америка Қўшма Штатларининг Ўзбекистондаги дипломатик миссияси раҳбари Жонатан Хеник билан учрашув бўлиб ўтди.
Суҳбат аввалида Хеник МОХИ раҳбарияти билан илк бор учрашаётганини таъкидлади. Дипломат институтнинг илмий-тадқиқот фаолияти, 2024 йилга мўлжалланган халқаро тадбирлар жадвали билан танишди.
Томонлар ўзаро манфаатли ҳамкорликнинг бугунги ҳолати ва истиқболини, минтақавий ва халқаро аҳамиятга молик долзарб масалаларни, “С5+1” формати доирасида Марказий Осиёдаги жараённи муҳокама қилдилар.
Ўтган йил Нью-Йоркда бўлиб ўтган “С5+1” давлат раҳбарларининг биринчи тарихий саммити якунлари алоҳида қайд этилди. Элчининг сўзларига кўра, ушбу платформа ўзаро ҳурмат ва ишончга асосланган барқарор шерикликка замин яратади.
Шу нуқтаи назардан Марказий Осиё давлатлари ва АҚШнинг хавфсизликни мустаҳкамлаш, иқтисодиётни кучайтириш, барқарор ривожланишни қўллаб-қувватлаш, иқлим ўзгаришига қарши курашиш ва бутун минтақада тинчликни мустаҳкамлашга содиқлиги эътироф этилди.
Учрашув якунида Хеник икки мамлакатнинг “ақл” марказлари даражасида ўзаро муносабат ўрнатиш зарурлигини таъкидлади, АҚШнинг етакчи таҳлилий муассасалари, жумладан Атлантика кенгаши, Тинчлик институти, Каспий сиёсати маркази ва Марказий Осиё ишлари бўйича Оксус жамияти билан тўғридан-тўғри алоқа ўрнатишда ёрдам беришга тайёрлигини билдирди.
Ғ.Хонназаров, ЎзА