АҚШ етакчиси Жо Байденнинг президентлик пойгасидаги «ўхшамаган» чиқишлари ва соғлигидаги жиддий муаммолар уни сайловдан четлашишга мажбур қилди. У кеча америкаликларга мурожаатида, вице-президент Камала Харрисга ишонч билдириб, уни мамлакат раҳбарлигига номзод сифатида илгари сурди.
Таҳлилчилар фикрича, Байден ўз кампаниясини якунлаши ва уни қўллаб-қувватлаши Харрис хонимга узоқ кутилган мавқени олиб келди. Чунки, у “қора булутли” кунларда ҳам Байден учун “туриб бера олди”.
Вице-президент телеканалларда бир неча бор сайловолди чиқишлар қилиб, сиёсий шеригининг номзодини ҳимоя қилди ва асосий рақиб Дональд Трампга “ҳужум қилди”.
– Менимча, у овоз бериш ҳуқуқи ва иммиграция ислоҳоти каби жиддий масалаларни ҳал қилишда муҳим роль ўйнади, – деди «Georgetown” университетининг аёллар ва гендер тадқиқотлари дастури директори Надия Браун.
Онаси асли ҳиндистонлик, отаси ямайкалик бўлган Камала Харрис Калифорнияда туғилган. Ота-онаси у беш ёшлигида ажрашгач, Харрис онаси Шямала Гопалан қўлида тарбия топди.
Харрис хонимнинг айтишича, у ҳар доим ўзига ҳослиги билан ажралиб туради ва ўзини ҳақиқий «америкалик» деб таърифлайди.
– Менинг фикрим шу: мен ўзлигимни яхши кўраман. Мен ҳақимда истаганча мулоҳаза қилишингиз мумкин, барчасига розиман, – деган у.
Камала Харрис ўз фаолиятини Аламеда округи прокуратурасида бошлаган. Карьераси давомида Калифорниянинг бош прокурори ва ҳуқуқшунос бўлиб ишлади.
У Демократик партиянинг ўсиб бораётган юлдузларидан бири сифатида обрў қозонди ва бу куч уни 2017 йилда АҚШ сенатори этиб сайланишга туртки бўлди.
2021 йил 20 январда Харрис мамлакат вице-президенти сифатида қасамёд қилди. У бу лавозимга сайланган биринчи қора танли америкалик аёл ва биринчи жанубий осиёлик киши бўлди.
Вице-президент сифатида у имкониятларни кенгайтириш, оилаларга ёрдам бериш ва бутун мамлакат бўйлаб эркинликларни ҳимоя қилиш учун фуқароларни бирлаштиришга ҳаракат қилди. Шунингдек, у аёллар ҳуқуқи, хавфсиз яшаш, демократик тарзда овоз бериш, тоза сув истеъмоли ва тоза ҳаводан нафас олиш эркинлиги учун курашди.
Харрис Оқ уйда бўлганида бир нечта муҳим ташаббусларга эътибор қаратди ва у Байден маъмуриятининг энг машҳур ютуқларида муҳим роль ўйнади.
Сўнгги ҳафталарда АҚШ президентлигига номзодлар ҳаётида кескин ўзгаришлар содир бўлди, дейиш мумкин. Трампнинг ҳаётига суиқасд унга шон-шуҳрат олиб келган бўлса, кексайиб қолган Байден Демократлар партиясининг жиддий қаршиликлари туфайли “ўйиндан чиқди” ва давлат раҳбарлигига Камала Харрисни тавсия қилди.
Мусулмон Зиё тайёрлади,
ЎзА