Трамп тарафдори, сиёсий фаол шахс Чарли Кирк Юта штатидаги чиқиши чоғи ўққа тутилди. Нотиқ бўйнидан яраланган ва оғир аҳволда шифохонага етказилган. Воқеадан бироз вақт ўтиб Президент Дональд Трамп Киркнинг вафотини маълум қилди.

– Буюк ва ҳатто, афсонавий Чарли Кирк ҳаётдан кўз юмди, – деган Америка етакчиси. – Келажак авлодни унингдек яхши тушунадиган, ёшлар дардига Чарлидек шерик бўладиган одам йўқ. Марҳумни ҳамма яхши кўрарди, ҳурмат қиларди, айниқса мен. Аёлим билан бирга унинг рафиқаси Эрика ва оиласига таъзия билдирамиз.

Нишонга қарата 100-200 метрдан ўқ узилган. Фожиадан бир неча соат ўтгач, Федерал қидирув бюроси раҳбари Кэш Пател жиноят бўйича бир шахс ушланганини эълон қилди. Бироздан сўнг, яъни сўроқ қилингач, гумондор қўйиб юборилган.

Чарли Кирк ким эди?

31 ёшли Чарли Кирк АҚШдаги консерватив сиёсий оқимнинг, қолаверса шахсан Дональд Трампнинг энг машҳур иттифоқчиси, тарафдорларидан бири эди. У ўзи ташкил этган талабалар уюшмаси кўмагида мактаб, коллеж ва университетларда анъанавий Америка қадриятларини тарғиб қиларди. Университет шаҳарчаларида очиқ сиёсий мунозаралар ташкил этарди.

Ижтимоий тармоқда миллионлаб обуначига эга ёш фаол мамлакат бўйлаб республикачиларнинг турли тадбирларида ҳозир эди. Ўтган йил у тарафдор сайловчилар фаоллигини кучайтиришда бор маҳоратини ишга солган. Масалан, Аризонада минглаб янги сайловчиларни рўйхатдан ўтишга ундаган ва бу саъй-ҳаракат Трампнинг ғалабасига салмоқли ҳисса бўлиб қўшилган.

Аҳамиятлиси, Киркнинг ўлдирилишига нафрат билдирган республикачилар сафига жуда кўп демократ сиёсатчилар ҳам қўшилди.

– Мамлакатимизда бундай зўравонликка ўрин бўлмаслиги керак, – деб ёзди аввалги Президент Жо Байден.

Собиқ вице-президент, Трампнинг сайловдаги асосий рақиби Камала Харрис воқеага “Америкада сиёсий сабаб туфайли зўравонликка йўл қўйилмаслиги лозим” дея изоҳ берди.

Маълум бўлишича, марҳум Чарли Кирк Трампнинг ҳар икки президентлик даврида сиёсий маслакдош сифатида Оқ уйга мунтазам келиб турган экан.

<iframe width="650" height="420" src="https://www.youtube.com/embed/dUPDDSrd80I" title="Amerikada siyosiy faol otib o‘ldirildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА