VFA-136 эскадрильясига қарашли “F/A-18E Super Hornet” қирувчи-бомбардимончи самолёт Қизил денгизда сузиб кетаётган Американинг “USS Harry S. Truman” авиа ташувчи кема саҳнидан қулади ва чўкиб кетди. Ушбу маълумотни АҚШ ҳарбий-денгиз кучлари тасдиқлаган.

– Учоқ ангар палубасида тортиб олинаётган пайт экипаж машинани бошқаролмай қолган, – дейилади департамент хабарида. – Натижада учоқ эвакуатор билан бирга қулаган.

Денгиз флоти аниқлик киритишича, экипажнинг барча аъзолари хавфсиз эвакуация қилинган. Бир денгизчи енгил жароҳат олган. Ҳодиса сабаби тергов жараёнида аниқланади.