Рашидбек Аҳмадалиев Қува туманининг Бўстон қишлоғида истиқомат қилади.

Рашидбек Аҳмадалиев Қува туманининг Бўстон қишлоғида истиқомат қилади. Томорқадаги экинлар ва кундалик эҳтиёж учун ҳовлисидан сув чиқариш мақсадида қудуқ кавлаётганди. Бирдан икки метр чуқурликка етганда чилдирмадек келадиган сопол буюмнинг оғзига кўзи тушди. Ҳунармандчилик санъатига бефарқ бўлмаган Р.Аҳмадалиев шу ернинг ўзидаёқ барча ишларни таққа тўхтатиб, керакли жойларга хабар беришни мақсад қилди.

- Чуқурликка сув йўлини топиш учун қозиқ қоқаётганимда, мосламам қаттиқ жисмга тегиб кетди. Кавласам, тандирдек келадиган қадимий ҳунармандчилик буюми кўринди, - дейди Рашидбек Аҳмадалиев. - Кимга қандай қилиб хабар беришни билмадим. Лекин яқинда хорижда ўқиб олган дипломимни нострификация қилиш учун Давлат хизматлари марказига ариза бергани боргандим. Уларнинг ахборот хизматлари соатдек аниқ ишлашидан хабарим бор эди. Шунинг учун негадир улар бу ҳодисани керакли жойларга етказар, деган умидда тўппа-тўғри Давлат хизматлари агентлигининг бот каналига хабар ёздим. Буни қаранг! Бироз вақт ўтди-ю, ДХА Фарғона вилоят бошқармасининг ахборот хизматидан вакил чиқди. Шундан кейин, мухбирлар ва журналистларнинг телефон қўнғироқлари бошланди. Хуллас, эндиликда ҳамма қизиқиш билдиряпти. Лекин қум тўла буюм ичини ҳали кавламадим. Топилмага озор етказиб қўйишдан тийилиб турибман.

Қува туманининг Бўстон қишлоғидаги Аҳмадалиевлар хонадонидан топилган ушбу топилма Ўзбекистон миллий тарихида яна қандайдир янги илмий хулосаларга олиб келишга сабаб бўлар. Балки кулолчилик буюмининг ичидан тарихий нодир буюмлар, китоблар ва ёки қимматбаҳо дуру жавоҳирлар, олтинлар топилар. Бунга мутахассислар аниқлик киритади.