Жорий йилнинг 31 январидан 7 февралигача мамлакатимизнинг Сурхондарё, Қашқадарё, Самарқанд, Бухоро вилоятлари ва Тошкент шаҳридаги Нақшбандия тариқатининг Олтин силсила пирлари зиёратгоҳлари бўйлаб “Нақшбандия фестивали” зиёрат тадбирлари бўлиб ўтмоқда.
Президентимиз ташаббуси билан мамлакатимизда яшаб ўтган буюк мутафаккир зотларнинг ҳаёти ва бой илмий меросини ўрганиш, чуқур тадқиқотлар олиб бориб, жаҳонга тараннум этишга қаратилаётган юксак эътибор дунё сайёҳларининг юртимизга қизиқиш ҳамда интилишини оширишга, зиёрат туризмини янада ривожлантиришга хизмат қилмоқда. Жумладан, ўтган йилнинг декабрь ойида “Grand Atlas Discovery” туристик компанияси Ўзбекистоннинг Малайзия ва Индонезиядаги элчихоналари ҳамкорлигида мамлакатимизнинг зиёрат туризмини кенг тарғиб қилгач, Индонезия, Малайзия, Ҳиндистон, Марокаш, Буюк Британия, Туркия, Канада, Бруней ва Сингапур давлатларидан 150 дан ортиқ тариқат билимдонлари, олим ва шайхлар, талабалар мазкур зиёрат тадбирида иштирок этиш истагини билдирди.
Шу мақсадда мамлакатимизга келган меҳмонлар Сурхондарё вилоятига сафарини беназир аллома Ҳаким Термизий ҳоки қўйилган муқаддас мажмуани зиёрат қилишдан бошлади.
Ўтмишдан илму маърифат маркази, маданият ўчоғи сифатида танилган Ўзбекистоннинг жанубидаги воҳа кўплаб улуғ муфассир, муҳаддис, мутакаллим, мутасаввиф ва фақиҳларга бешик бўлган. Табаррук бу заминда етишиб чиққан улуғ олим ва мутафаккирлар дунё илм-фани ҳамда ислом олами ривожига катта ҳисса қўшган. Ҳаким Термизий исломий ҳикмат ва тасаввуф мактаби назариясини, Имом Термизий ҳадис илмини ривожлантирган. Сўфи Оллоёр калом илми билан Хожа Алоуддин Аттор, Муҳаммад Зоҳид, Дарвеш Муҳаммад Имканагий, Шайх Абдулҳай Чағониёний каби улуғ зотлар Нақшбандия тариқати силсиласининг етук намояндалари сифатида танилган. Бу тариқат бизнинг замонамизда ҳам жаҳоннинг кўплаб ҳудудларида кенг тарқалган.
Дунёнинг ўнга яқин давлатидан келган Нақшбандий тариқатининг издошлари Олтинсой туманининг тоғли Қўшарча маҳалласидаги Хўжа Муҳаммад Мавлоно Зоҳид мақбарасини ҳам зиёрат қилди.
Хўжа Аҳрори Валийнинг шогирди бўлган ҳазрат Нақшбандия тариқатининг Олтин силсиласида йигирманчи пир сифатида тилга олинади. Манбаларда озғин вужудли, ранги оқ, соқоли сийрак, тақво, илмда замонасининг ягонаси, дея таърифланган Хожа Мавлоно Муҳаммад Зоҳиддан қатор асарлар мерос қолган. Айниқса, “Тажвиди турки” (“Туркий қироат қоидалари”) китоби муборак Калом – Қуръони каримни қироат қилиш, талаффузи ва имло қоидалари батафсил ёритилгани билан илму толибларнинг севимли асарларидан бирига айланган.
Мўътадиллиги, осонлиги ва суннатга эргашишдан иборат бўлгани учун Нақшбанд раҳматуллоҳи алайҳининг тариқатлари ислом оламида кенг тарқалган. У суннатга эргашишга алоҳида эътибор қаратади.
Меҳмонлар зиёрат амалларини адо этгач, Нақшбандия тариқати, Нақшбандий сўфийликнинг мазмун-моҳияти, Мавлоно Зоҳиднинг эзгу амаллари ва хислатлари ҳақида атрофлича фикр алмашди. Маҳалла аҳли билан дилдан суҳбат қурди. Тоғли қишлоқ ҳунармандлари меҳмонларга эсдалик совғалар улашди.
Денов туманидаги Намозгоҳ маҳалласида Хожа Алоуддин Аттор зиёратгоҳи жойлашган. Ул зоти икром Баҳоуддин Нақшбанднинг севимли шогирди ва куёви, икки буюк халифасидан бири ва мутасаввиф олимдир. Тадбир қатнашчилари муқаддас қадамжода бўлиб, зиёрат амалларини бажарди. Шеробод туманидаги Имом Термизий мажмуасида улуғ алломани зиёрат қилди. Шу ерда буюк аждодимизнинг ҳаёти ва ҳадисшунослик мактаби тўғрисида атрофлича маълумот берилди.
– Муқаддас Ислом оламига беназир олим ва фузалоларни улғайтириб берган юртингизга зиёратга келганимдан жуда хурсандман, – дейди малайзиялик Абдураҳмон ибн Яқуб. – 72 ёшдаман, Термизийлар асарларини, Имом Термизий тўплаган ҳадисларни ўқиб вояга етганмиз. Бу воҳа одамларининг маданияти, меҳмондўстлиги, миллий қадриятларини сақлаб қолгани жуда ёқди. Орзуим ушалиб, шундай азиз инсонлар яшаган осуда ва обод юрт нафасини олгач, вужудим енгил бўлиб қолганидан қувончим чексиз.
Шу куни меҳмонлар Қашқадарё вилоятига жўнаб кетди.
Холмўмин Маматрайимов,
ЎзА мухбири