Ўзбекистон миллий терма жамоаси марказий ҳимоячиси Абдуқодир Ҳусанов “Манчестер Сити” клубига 40 миллион евро ва бонуслар билан трансфер қилинмоқда.

Ҳамюртимиз "Манчестер Сити" томонидан юборилган хусусий самолётда Манчестерга етиб борди. Бугун футболчимиз "Манчестер Сити"да тиббий кўрикдан ўтиши кутилмоқда. Бу ишлар муваффақиятли якун топса, тез орада "МС" 20 ёшли футболчимизнинг трансферини расман эълон қилади.  

Агар бу трансфер расман эълон қилинса, Абдуқодир Ҳусанов нархи Ўзбекистон ва Марказий Осиё футболчилари учун янги рекорд сифатида қайд этилади.  

Бу орқали Англиянинг амалдаги чемпион клуби ўзбек футболчиси учун тўлайдиган бадал пули Осиёнинг деярли барча мамлакатлари терма жамоаларининг умумий қийматидан қиммат бўлиб чиқади.  

Жумладан, Осиё футбол конфедерацияси аъзолари орасида таркибининг умумий нархи 40 миллион евродан юқори бўлган фақатгина тўртта терма жамоа бор.  

“Transfermarkt” порталида қайд этилишича, қитъамизнинг энг қиммат терма жамоаси Япония бўлиб, жамоанинг умумий қиймати 280,5 миллион еврони ташкил қилади.  

Иккинчи ўринда эса Жанубий Корея терма жамоасидир. Ушбу жамоа 158,15 миллион еврога баҳоланмоқда. Учинчи ўринда 47 миллион еврога баҳоланаётган Ўзбекистон миллий терма жамоаси экани қувонарли ҳолдир. Тўртинчи ўринда Эрон термаси бормоқда. Шуни қайд этиш лозим, А.Ҳусановнинг трансфери расман эълон қилингандан сўнг бу нарх янада ошади.  

Қолган, Осиё футбол конфедерациясига аъзо яна 43 та мамлакат терма жамоалари таркибининг умумий қиймати “Манчестер Сити”нинг Абдуқодир Ҳусанов учун тўлайдиган бадал пулига тенглаша олмайди. 

Маълумот ўрнида: Европа қитъаси кучли бешлик чемпионатларининг гранд клублари шу пайтга қадар Осиё мамлакатларидан фақат Япония ва Жанубий Корея футболчилари учун катта сумма тўлаган. Мамлакатимиз футболчилари орасида Абдуқодир Ҳусановдан ташқари фақатгина “Рома” 2021 йил Элдор Шомуродов учун 19,6 миллион евро харажат қилган.  

Жавоҳир Тошхўжаев,

ЎзА