Ижтимоий тармоқларда “Мустақилликнинг 25 йиллиги” кони ҳудудида чиққан газ ёндириб қўйилгани ҳақидаги видеохабар тарқалди.

Маълум бўлишича, айни пайтда ҳудудда кичик ҳажмда тўпланган газни хавфсиз ёқиш ишлари олиб борилаётган экан. Бу ҳақда Энергетика вазирлиги расмий баёнот берди. 

–Айтиш жоизки,– дейилади жумладан баёнотда.–“М-25” кони ҳудудида ҳеч қандай кутилмаган вазиятлар кузатилмаган. Бугунги кунда 2024 йил сентябрь ойида метан эмиссияси содир бўлган қудуқ ўрнида объектни консервация қилиш бўйича режалаштирилган ишлар олиб борилмоқда ва бу ерда доимий мониторинг юритиляпти.

604-сонли қудуқда тозалаш ишлари олиб борилаётганда қудуқдан олис ҳудудларда ер юзасига яқин жойлашган бўшлиқлар ва коллекторлардаги микро ёриқларда кичик ҳажмдаги газ тўпланган.

Айни пайтда ҳудудда кичик ҳажмда тўпланган газни ёқиш орқали зарарсизлантириш ишлари олиб борилмоқда. Бундан кўзланган мақсад кислотали газлар атмосферага чиқишининг олдини олишдир. 

Ушбу жараён атроф-муҳит ифлосланишининг олдини олишда стандарт ёндашув ҳисобланади ва халқаро саноат хавфсизлиги талабларига тўла жавоб беради.

Режалаштирилган консервация ва профилактика ишларини мазкур технологик жараённинг ўзига хос хусусиятларини тушунмайдиганлар бошқача талқин қилиши мумкин. 

Бунга ҳолат бўйича тарқалган видеолавҳа яхши мисол бўла олади. 

Вазиятга ойдинлик киритиш учун Бойсун тумани ҳокимлиги ходимлари билан ҳам боғландик. Улар газ кичик ҳудудда ёниб тургани, бироқ видеолавҳа тунда олингани учун катта майдонни қамраб олгандек туюлаётганини маълум қилишди.

Холмўмин Маматрайимов, ЎзА мухбири