Давлат Кадастр агентлиги ҳамда Кадастрлар палатаси Андижон вилояти бошқармалари томонидан 2024 йилда амалга оширилган ишлар юзасидан матбуот анжумани ўтказилди.
Оммавий ахборот воситалари, давлат, нодавлат ташкилотлари ахборот хизматлари вакиллари, блогерлар, соҳа мутасаддилари иштирок этган тадбирда мамлакатимизда кадастр тизимини ривожлантириш, соҳага оид қонунлар, қабул қилинган қарорлар ижросини таъминлаш, аҳолига кўрсатилаётган хизматлар сифатини ошириш борасида кенг кўламли ишлар олиб борилаётганлиги таъкидланди.
Анжуманда Кадастр агентлиги вилоят бошқармаси, унинг туман, шаҳар бўлимлари, Кадастрлар палатаси вилояти бошқармаси томонидан 2024 йил давомида ер қонунчилигига оид, шунингдек, мурожаатлар билан ишлаш борасида амалга оширилган ишлар ҳақида маълумотлар берилди.
– Бошқарма, туман, шаҳар бўлимлари мутахассислари томонидан ўтказилган ўрганишлар, ер назорати тадбирлари давомида ўтган йили 7 минг 235 та ҳолатда 383,4 гектар ер майдони ўзбошимчалик билан эгаллаб олинганлиги аниқланди, – дейди Кадастр агентлиги вилоят бошқармаси бошлиғи ўринбосари Ботиржон Мирзааҳмедов. – Аниқланган ноқонуний ҳолатларнинг 6 минг 457 таси ёки 82 фоизи бартараф этилди. Шунингдек, 548 та ҳолат бўйича суд органларига даво аризалари киритилди, 85 та аниқланган қонунбузилиш ҳолатларида жиноят аломатлари мавжуд бўлганлиги сабабли ҳуқуқий баҳо бериш учун тегишли ҳужжатлар прокуратура органларига тақдим этилди.
Бундан ташқари, 2 минг 432 та ҳуқуқбузарлик бўйича маъмурий жарималар расмийлаштирилган.
Анжуманда йил давомида кадастр бошқармасига барча манбалар орқали 806 та мурожаат келиб тушганлиги, мазкур мурожаатларнинг 619 таси ижобий ҳал этилганлиги, 163 тасига ҳуқуқий тушунтиришлар берилганлиги, 9 таси белгиланган тартибларда рад этилганлиги, умуман, йил давомида юридик ва жисмоний шахсларнинг мурожаатларига асосан 73 минг 441 та кўчмас мулк объектига кадастр паспорти расмийлаштирилганлиги айтиб ўтилди.
Давлат кадастрлар палатасига кўчмас мулкка бўлган ҳуқуқларни давлат рўйхатидан ўтказиш бўйича 126 минг 827 та мурожаат келиб тушган. Мурожаатларнинг 71 минг 144 таси ижобий ҳал этилиб, кўчмас мулкка бўлган ҳуқуқлар давлат рўйхатидан ўтказилган.
Шунингдек, анжуманда “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги Ўзбекистон Республикаси қонуни ижроси доирасида режа асосида босқичма-босқич хатлов ишлари олиб борилаётганлиги, 8 минг 573 та кўчмас мулк объекти хатловдан ўтказилганлиги, ўтган йил якуни билан 863 та кўчмас мулк объектининг хатлов жамланмалари шакллантирилиб, кўриб чиқиш учун республика Ишчи гуруҳига тақдим этилганлиги қайд этилди.
Анжуманда жорий – 2025 йил давомида амалга оширилиши режалаштирилган ишлар хусусида ҳам маълумотлар берилди.
Ф. Убайдуллаев, З. Умрзоқов (сурат), ЎзА мухбирлари