Шу кунларда Грециянинг Ираклион шаҳрида оғир атлетика бўйича ёшлар ўртасида навбатдаги жаҳон чемпионати баҳслари бўлиб ўтмоқда.
Жорий йилнинг 10 майига қадар давом этадиган жаҳон чемпионатида 61 та давлатдан 304 нафар ёш оғир атлетикачи баҳсларга киришган. Шундан 153 нафари ўғил болалар, 151 нафарини эса қизлар ташкил этган.
Жаҳон чемпионати дастурига биноан кеча қизлар 45 ва 49 килограмм оғирликда, ўғил болалар эса 55 кило оғирликда дастлабки саралаш баҳсларида супачага кўтарилишди.
Бугун, 3 май куни қизлар 55, ўғиллар 61 кг оғирликдаги беллашувларда иштирок этади.
Халқаро майдонда оғир атлетиканинг янги юлдузларини кашф этадиган мазкур чемпионтда Ватанимиз шарафини 73 килограммда Оғабек Тўхтаев, 89 кг. оғирликда Ҳожиакбар Олимов, 102 кг.да Шарофиддин Амриддинов, +109 кг.да Мирҳосил Мирзабоев ҳамда аёллар ўртасидаги баҳсларда Жамила Панфилова(55) ва Турсуной Жабборова(87) ҳимоя қилади.
Эътиборли жиҳати, бугун кечки пайт бўлиб ўтадиган баҳсларда ҳамюртимиз Жамила Панфилова 55 кг оғирликда жаҳон чемпионатининг медаллари учун баҳсларга киришади.
Ўтган йили мамлакатимиз пойтахти Тошкентда ўтган ёшлар ўртасидаги дунё биринчилигида илк бор иштирок этган Жамила дунёнинг 50 га яқин энг сара полвон қизлари орасида кучли 15 таликдан жой эгаллаганди.
Қолган спортчиларимиз, 73 кг вазн тоифасида Оғабек Тўхтаев 5 майда, Ҳожиакбар Олимов 7 майда, Шарофиддин Aмриддинов ва Турсуной Жабборова 9 май куни ҳамда +109 кг вазндаги полвонимиз Мирҳосил Мирзабоев жаҳон чемпионатининг сўнгги куни мусобақаларда қатнашади.
Мазкур нуфузли мусобақада Халқаро оғир атлетика федерацияси қарорига биноан Россия ва Беларусь терма жамоалари иштирок этмаётган бўлса, унда қатнашаётган 13 нафар Украина терма жамоаси спортчиларининг яшаш, овқатланиш ва чемпионатда иштирок этиш харажатлари Греция томонидан қоплаб берилмоқда.
Эслатиб ўтамиз, ўтган йили пойтахтимизда ўтган ёшлар ўртасидаги жаҳон чемпионатида медаллар жамғариш бўйича Қозоғистон, Туркия, Ўзбекистон, Индонезия ва Арманистон оғир атлетикачилари етакчилик қилишган эди. Ўшанда мамлакатимиз ёшлар терма жамоаси 14 та медални қўлга киритганди.
Т. РЎЗИЕВ, ЎзА