Ўзбекистон Республикаси Олий Мажлиси Сенати раиси Танзила Норбоева бошчилигидаги ишчи гуруҳ Тошкент вилояти Юқори Чирчиқ туманидаги маҳаллаларда фаолиятини бошлаётган хотин-қизлар фаоллари билан бирма-бир суҳбатлашди.

Учрашувда  Оила ва хотин-қизлар Давлат қўмитаси бошқарма бошлиғи М.Нурматова,  Тошкент вилояти ҳокими ўринбосари – оила ва хотин-қизлар бошқармаси бошлиғи вазифасини бажарувчи З.Миргазиева,  туман ҳокими У.Атемов ҳамда сектор раҳбарлари иштирок этди. 

Очиқ мулоқотда барча номзодларга аёлларнинг жамиятда ижтимоий-сиёсий фаоллигини ошириш,  уларни барча соҳада қўллаб-қувватлашга доир ислоҳотларнинг мазмун-моҳияти тушунтирилиб,  уларни  амалда тадбиқ этиш юзасидан тавсиялар  берилди.

Хусусан, хотин-қизларнинг таълим ва касбий кўникмалар олиши, муносиб иш топишига ҳар томонлама кўмаклашиш, тадбиркорлигини қўллаб-қувватлаш, иқтидорли ёш хотин-қизларни аниқлаш ва уларнинг қобилиятини тўғри йўналтириш борасида муҳим вазифалар айтиб ўтилди.

Ҳудудларда, айниқса, қишлоқларда хотин-қизларга кўрсатиладиган тиббий-ижтимоий хизматлар сифатини ошириш, соғлом турмуш тарзини тарғиб қилиш борасидаги ишлар самарадорлигини ошириш лозимлиги таъкидланди. Жойларда “Аёллар дафтари” билан ишлаш, мутасадди ташкилотлар, секторлар томонидан хотин-қизлар муаммолари ўз вақтида бартараф этилиши устидан жамоатчилик назоратини ўрнатиш хусусида  ҳам фикр  алмашилди.

А. Мусаев, ЎзА.