Сўнгги кунларда давлат хизматлари марказларида ҳайдовчилик гувоҳномасини янги намунадагисига алмаштириш хизматидан фойдаланиш учун ташриф буюрувчилар оқими ортган. Бу эса марказларда узун навбатлар ҳосил бўлишига сабаб бўлмоқда.

Давлат хизматлари агентлиги матбуот хизматидан маълум қилишларича, ушбу муаммони бартараф этиш ҳамда фуқароларимизга қулайлик яратиш мақсадида  агентлик томонидан бир қатор чоралар кўрилмоқда.

Эндиликда миллий ҳайдовчилик гувоҳномасини янги намунадагисига алмаштириш учун Тошкент шаҳрининг Мирзо Улуғбек, Яккасарой ва Сергели туманлари давлат хизматлари марказларига ҳам мурожаат қилиш мумкин (Аввал бу хизматдан пойтахтимизнинг Олмазор, Учтепа, Шайхонтоҳур, Миробод, Юнусобод, Чилонзор, Яшнобод туманларида фойдаланиш мумкин бўлган).

Фуқаролар ҳайдовчилик гувоҳномасини янгисига алмаштириш учун рўйхатдаги давлат хизматлари марказларига дам олиш кунлари (шанба ва якшанба, байрам кунларидан ташқари) соат 9:00 дан 15:00 гача ҳам мурожаат қилишлари мумкин.

Маълумот учун, эски ҳайдовчилик гувоҳномасини янги намунадагисига алмаштириш учун ИИББ ЙҲХБ бўлимларига  ҳам мурожаат қилиш мумкин.

 

Муҳайё Тошқораева,

ЎзА