Бирлашган Қироллик миллий соғлиқни сақлаш хизмати томонидан эълон қилинган маълумотга кўра, Буюк Британияда мутацияга учраган вирусни юқтирганлар сони декабрь ойида уч баравар кўпайган.

Декабрнинг сўнгги ҳафтасида 311 минг 372 киши вирус юқтиргани тасдиқланди, бу жуда даҳшатли кўрсаткич.

Қайд этилган маълумотларга қараганда, 2020 йил ноябрь ойи сўнггида мамлакатда 97 минг 340 кишида касаллик аниқланган эди. Аммо декабрь охирига келиб юқумли касалликка чалинганлар сони уч баравар кўпайди.

Шу билан бирга, Буюк Британияда коронавирусдан вафот этганлар сони 7 январь куни 1 минг 41 кишини ташкил қилди, ўтган йилнинг апрель ойидан бери биринчи марта коронавирусдан ўлганлар сони кунига минг кишидан ошди.

5 январь куни Буюк Британия миллий статистика бюроси мамлакатда 1,1 миллионга яқин одам коронавируснинг янги турини юқтирганини эълон қилди.

Саутгемптон университетининг соғлиқни сақлаш бўйича мутахассиси, доктор Майкл Хайд бу рақамни «жуда юқори» деб атади. Ҳукумат вакилларининг таъкидлашича, хавотирли ўсишга Кент, Лондон ва жануби-шарқда пайдо бўлган вируснинг янги ўта юқумли варианти сабаб бўлган.

Ҳукумат янги коронавируснинг таҳдид даражасини энг юқори даражага кўтарган. Шу боис эпидемияни олдини олишнинг бутун мамлакат бўйлаб блокадаси февраль ёки март ойининг ўрталарига қадар давом этади.

Шоҳида Жалилова