Тегишли ишчи гуруҳлар томонидан бино ва иншоотларни лойиҳалаш ҳамда экспертизадан ўтказишда янги сейсмологик кўрсаткичлардан фойдаланиш мақсадида 2017-2024 йиллар давомида қурилган 8 минг 974 та ва 2025 йилда қурилиши режалаштирилган 2 минг 559 та ҳамда фойдаланишга топширилган 301 та, жами 11 минг 834 та кўп квартирали уй-жойнинг зилзилабардошлиги хатловдан ўтказилган.

Ишчи гуруҳлардаги сейсмолог, қурувчи, конструктор, архитектор ва муҳандислар томонидан 10 минг 705 та (90 фоиз) кўп квартирали уй-жойлар ҳужжатли ва визуал ўрганиб чиқилди. Шундан 3 минг 107 та уй-жой хусусий экспертизадан ўтказилган, 1 минг 434 таси рўйхатдан ўтмаган ва 185 тасида ноқонуний равишда қават қўшилгани аниқланди.

Ўрганиш натижасида 9 минг 397 та (88 фоиз) уй-жой мустаҳкамлиги талабга жавоб бериши ва 1 минг 308 та (12 фоиз) уй-жойда инструментал-техник текширувдан ўтказиш лозимлиги аниқланиб, шундан 417 та (31 фоиз) уй-жойда текширув якунланди.

Текширув натижалари 339 та уй-жой сейсмик мустаҳкамлигини, 77 тасини қўшимча мустаҳкамлаш талаб этилишини ва 1 таси сейсмик заифлигини кўрсатди.

Бундан ташқари, 2025 йил 1 июлдан ўзбошимчалик билан қурилган бино-иншоотларни Қурилиш ва уй-жой коммунал хўжалиги соҳасида назорат қилиш инспекциясидан рўйхатдан ўтказиш тўхтатилган бўлса-да, ноқонуний қурилишлар сони 213 тага ошганлиги аниқланди.

Кўрилган чоралар натижасида 85 та қоидабузар лойиҳа ташкилотининг фаолиятини тўхтатиш ёки лицензиясини бекор қилиш ҳақида тақдимнома киритилган, 8 тасининг лицензияси бекор қилинган. 115 та бино белгиланган тартибда буздирилди, 98 та жиноят иши қўзғатилди.

Бу ҳақда қуйи палата мажлисида Бош прокурор ўринбосари Дилмурод Қосимов айтиб ўтди.  

М.Комилова,  

ЎзА