Өзбекстан экология саласындағы халықаралық байланыстарын кеңейтуде
Самарқанд қаласында өтіп жатқан «Eco Expo Central Asia 2026» халықаралық көрмесі Өзбекстанның экологиялық дипломатия және тұрақты даму саласындағы халықаралық ынтымақтастық байланыстарын одан әрі кеңейтуге арналған маңызды алаңға айналды.
Көрме аясында Өзбекстан Республикасы Президентінің экологиялық мәселелер жөніндегі кеңесшісі, Экология және климаттың өзгеруі жөніндегі ұлттық комитеттің төрағасы Азиз Абдухакимов бірқатар беделді халықаралық ұйымдар мен мекемелердің басшыларымен кездесулер өткізді. Кездесулер барысында биоалуантүрлілікті сақтау, климат өзгерісіне бейімделу, «жасыл» инновациялар, экологиялық білім беру және тұрақты экономикалық даму мәселелері талқыланды.
Атап айтқанда, Табиғатты қорғау халықаралық одағының бас директоры Гретел Агилармен өткен кездесуде биоалуантүрлілікті сақтау, табиғатқа негізделген оңтайлы шешімдерді кеңінен енгізу, қорғалатын табиғи аумақтарды басқаруды жетілдіру және экотуризмді дамыту мәселелері қаралды. Сонымен қатар, биоалуантүрлілік жөніндегі жаңартылған Ұлттық стратегия мен іс-қимыл жоспарын әзірлеу, Орталық Азияның өңірлік Қызыл кітабын жасау және трансшекаралық қорғалатын аумақтарды дамыту бағытындағы ынтымақтастық мәселелері жайлы сөз болды.
Біріккен Ұлттар Ұйымының Өнеркәсіпті дамыту ұйымы өкілдерімен өткен келіссөздер барысында «жасыл» индустрияландыру, экологиялық таза технологияларды енгізу, қалдықтарды тиімді басқару және өнеркәсіпті жаңғырту мәселелері талқыланды. Тараптар климаттық инновацияларды қолдау, стартаптарды дамыту және климаттық тұрақтылықты қамтамасыз етуге бағытталған жаңа жобаларды жүзеге асыру перспективаларын да қарастырды.
Сондай-ақ, «National Geographic Society» ұйым өкілдерімен болған кездесуде Өзбекстан мен Орталық Азияның бірегей табиғи мұрасын халықаралық деңгейде насихаттау, бірлескен ғылыми зерттеулер жүргізу, деректі фильмдер мен цифрлық контент әзірлеу мәселелері талқыланды. Әсіресе, Арал өңірі, тау және шөл экожүйелерін зерттеу бойынша бірлескен экспедициялар ұйымдастыру ұсынылды.
Ал Оман Қоршаған ортаны қорғау басқармасының басшылығымен өткен кездесуде шөлейттенуге қарсы күрес, су ресурстарын басқару, биоалуантүрлілікті сақтау және қалдықтармен жұмыс істеу салаларындағы практикалық ынтымақтастық мүмкіндіктері қарастырылды. Сонымен қатар, қуаңшылыққа төзімді өсімдіктер мен құмды бекіту технологиялары бойынша бірлескен зерттеулер жүргізу бастамасы көтерілді.
