Вашингтондаги отишма: жаҳон етакчилари кескин муносабат билдиришди (+видео)
Euronews хабарига кўра, жаҳон етакчилари Вашингтонда бўлиб ўтган журналистлар кечасидаги отишмага “демократик жамиятда зўравонликка ўрин йўқ” дея муносабат билдиришди.
Гумонланувчи 31 ёшли Коул Томас Аллен, шанба куни кечқурун меҳмонхона фойесига милтиқ, тўппонча ва бир нечта пичоқ билан кириб келган. У махфий хизмат ходимлари билан отишмага киришиб, улардан бирини яралаган, аммо ҳимоя кийими яраланган ходимнинг ҳаётини асраб қолган. Кейинроқ Трамп бу ходим билан гаплашганини ва унинг аҳволи яхши эканини айтди.
Ҳужумчини махфий хизмат ходимлари тезда қўлга олишганидан кейин, АҚШ президенти, биринчи хоним ва вице-президент меҳмонхонадан дарҳол эвакуация қилинган.
Урсула фон дер Ляйен: “Сиёсатда зўравонликка ҳеч қачон ўрин бўлмаслиги керак”, — деб ёзар экан, полиция ҳамда қутқарувчиларнинг тезкор ҳаракатини олқишлади.
Европа Иттифоқининг ташқи ишлар ва хавфсизлик сиёсати бўйича олий вакили Кая Каллас барча иштирокчилар, жумладан Трамп ҳам хавфсиз эканидан хурсандлигини билдирди. У: “Эркин матбуотни нишонлашга қаратилган тадбир қўрқинч саҳнасига айланмаслиги керак. Яраланган офицер тезроқ соғайиб кетсин”, — деди.
Италия бош вазири Жоржа Мелони Трамп ва бошқа иштирокчиларга ҳамдардлик билдириб, демократик жамиятларда сиёсий нафратга ўрин бермаслик керак, деди.
Германия канцлери “Биз қарорларни қурол билан эмас, кўпчилик овози билан қабул қиламиз”, — деди ва қатнашчиларга зиён етмаганидан хурсандлигини билдирди.
Туркия президенти Режеп Тоййип Эрдоған: “Демократик мамлакатларда кураш ғоялар орқали бўлади, зўравонликка ўрин йўқ”, — деди.
Нетаньяҳу АҚШ махсус хизматларининг тез ва қатъий ҳаракатини мақтаб, яраланган полиция ходимига соғлик тилади.
Покистон бош вазири Шаҳбоз Шариф бу ҳодисадан қаттиқ хавотирга тушганини билдирди.
Шунингдек, Мексика президенти Клаудия Шейнбаум, Венгриянинг амалдаги бош вазири Виктор Орбан ва Ҳиндистон бош вазири Нарендра Моди ҳам ҳужумни қораладилар.
<iframe width="640" height="420" src="https://www.youtube.com/embed/Cy-lNG7CeXg" title="Vashingtondagi otishma: jahon yetakchilari keskin munosabat bildirishdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe> Кенжа Бекжонов, Анвархўжа Аҳмедов (видео), ЎзА
