Вашингтон шаҳрида Марказий Осиё давлатлари элчихоналарининг Наврўз байрами ташкил этилди
АҚШнинг Вашингтон шаҳридаги Миллий Осиё санъати музейида Марказий Осиё давлатлари дипломатик ваколатхоналари иштирокида Наврўз байрамига бағишланган маданий-маърифий тадбир ташкил этилди.
Маълум қилинишича, ушбу улуғ айёмда Ўзбекистон элчихонаси фаол қатнашиб, миллий экспозициясини намойиш қилди. Экспозиция доирасида анъанавий кулолчилик буюмлари, бой маданий мерос намуналари, шунингдек, юртимизнинг сайёҳлик имкониятларини акс эттирувчи тарғибот материаллари кенг жамоатчилик эътиборига ҳавола этилди.
Тадбирда Марказий Осиё давлатлари элчихоналарининг биргаликда иштирок этиши маданий мулоқотни янада ривожлантириш, шу билан бирга, минтақага хос ягона ижобий имижни шакллантиришга хизмат қилди. Қўшма тақдимотда эса минтақанинг бой тарихи ва маданий мероси кенг халқаро аудиторияга намойиш этилди.
Музейда ўтган йиғинда маҳаллий аҳоли, хорижий сайёҳлар ҳамда экспертлар иштирок этиб, кўп сонли меҳмонлар ташриф буюрган. Бу эса Ўзбекистоннинг маданий ва сайёҳлик салоҳиятини халқаро миқёсда тарғиб этишда муҳим аҳамият касб этди.
Тадбир давомида музей директори Чейз Робинсон Ўзбекистон нафақат ўз миллий маданияти, балки бутун Марказий Осиё маданий меросини жаҳон ҳамжамиятига етказишда муҳим ўрин тутаётганини алоҳида таъкидлади. Мамлакат раҳбариятига ушбу йўналишда олиб борилаётган саъй-ҳаракатлар учун миннатдорлик ҳам билдирилган.
Б.ХУДОЙБЕРДИЕВ,
ЎзА
