Учувчининг сирли парвози: хавф, масъулият ва орзулар…

Учувчилик кўпчилик тасаввурида эркинлик, саёҳат ва баландлик билан боғланади. Учоқ ойнасидан пастга қараб, булутлар орасида сузиб бориш гўё орзудек туюлади. Бинобарин, бу манзара ортида мураккаб жараён, аниқ ҳисоб-китоб ва юқори даражадаги масъулият яширин. Учувчининг ҳар бир қарори нафақат техник бошқарув, балки инсон ҳаёти билан боғлиқ муҳим масала.

Бу касб вакиллари таъкидлашича, ҳар бир парвоз ўта пухта тайёргарлик талаб қилади. Об-ҳаво шароити, техник ҳолат, эҳтимолий йўналиш ўзгариши — барчаси олдиндан таҳлил қилинади. Айниқса, тебраниш, кучли шамол ёки бошқа бирор кутилмаган вазият учувчидан тезкор фикрлаш ва совуққонлик талаб этади. Шу боис учувчига нафақат билим, балки руҳий барқарорлик ва интизом ҳам ҳаводек зарур.

Парвоз давомида йўловчилар учун ҳаммаси одатий кўринса-да, кабина ичида доимий назорат ҳукмрон: ҳар бир белги, ҳар бир кўрсаткич кузатиб борилади. Энг муҳим вазифа эса хавфсизликни таъминлаш. Учувчилар кўпинча ички босимни яширган ҳолда, салонда сокинликни сақлашга ҳаракат қилади.

Табиийки, бу касбнинг ўзига хос жозибаси ҳам бор. Турли мамлакатларга парвоз, ҳар куни янги манзара, турфа муҳитда ишлаш учувчиликни оддий иш эмас, балки ҳаёт тарзига айлантиради. Бу йўлда муайян вақт оиладан узоқда бўлиш, тартибсиз иш жадвали каби қийинчиликлар ҳам мавжуд.

Ушбу жараёнларни яқиндан ҳис қилиш, учувчилик касбининг ички дунёсини чуқурроқ англаш мақсадида ЎзА мухбири “Uzbekistan Airways” учувчиси Муҳаммаджон Набижонов билан суҳбатлашди. Мулоқот давомида бу касб ортидаги ҳақиқий ҳаёт, масъулият ва синов янада яққол намоён бўлди.

<iframe width="640" height="420" src="https://www.youtube.com/embed/RTlSygZ2iIo" title="Uchuvchining sirli parvozi: xavf, mas’uliyat va orzular…" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мусулмон Зиё,
Ойбек Давронов (видео), ЎзА